Ил Дархан Айсен Николаев ыам ыйын 1 күнүгэр «Саха Өрөспүүбүлүкэтин сиригэр-уотугар 2020 сылга сааскы бултааһын уратыларын туһунан» ыйааҕы таһаарбыта.
Коронавирус даҥынан сибээстээн, быйыл саас кустааһын кэккэ хааччахтардаах буолла. Ол курдук, бултааһын болдьоҕор көҥүллэннэ эрээри, харантыын биллэриллибит сирдэригэр бобулунна. Ону таһынан ыам ыйын 30 күнүгэр диэри киин улуустартан хотугу улуустарга кустуу барыы хааччахтанна.
Экология, айылҕа харыстабылын уонна ойуур хаһаайыстыбатын министиэристибэтэ өрөспүүбүлүкэ олохтоохторун бу дьаһаллары итиэннэ бултааһын ирдэбиллэрин кытаанахтык тутуһарга сүбэлиир.
Итиэннэ бултааһын быраабыларыгар, айылҕа харыстабылыгар анаммыт «Баартаах бултуйуу» онлайн-викторинаҕа кыттарга ыҥырар. Олохтоммут үгэс быһыытынан, викторинаҕа сөптөөх хоруйу биэрбит биэс бастакы киһи өйдөбүнньүк бэлэхтэринэн бэлиэтэниэхтэрэ.
Онлайн-викторинаҕа маннык сыылканан киириллэр: https://docs.google.com/forms/d/e/1FAIpQLScUqZkfjrbKg5D-TgQEmeHvf6vL-4fBgWpSoeXOINgoFT63Xg/viewform.
Бу туһунан Экология, айылҕа харыстабылын уонна ойуур хаһаайыстыбатын министиэристибэтин пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru