Култуура уонна ускуустуба кэллиэһин дириэктэрэ Захар Никитин:
—Илин эҥэр киһитэ буоларбынан, Өлүөнэ эбэни туоруур муоста тутуллуохтааҕын туһунан истэммин наһаа үөрдүм.
Оҕо эрдэхпиттэн маннык кыһалҕа баарын истэн, билэн улааппытым. Өссө быыкаа сырыттахпына төрөппүттэрим: “Өлүөнэ эбэбитин туоруур муосталаахпыт буоллар. Хаһан тутуллара буолла”, — диэн наһаа баҕараллара. Онон бу норуот өр сылларга иитиэхтээбит санаата, урут-уруккуттан баҕарбыт баҕата сыллары уҥуордаан кэлэн дьэ туолар, олоххо киирэр буолбута, баараҕай тутуу ыытылларын туһунан үөрүүлээх сонун сири-дойдуну тилийэ сүүрүүтэ барыбытын улаханнык долгутта.
Иккиһинэн, муоста тутуллуута, улахан бырайыактар олоххо харгыһа суох киириилэригэр өссө төгүл бигэ олук буолара саарбахтаммат.
Үсүһүнэн, Сахабыт сирэ, дьонун-сэргэтин олоҕо-дьаһаҕа биллэ тупсуута, сайдыыта, тиһиктээх сибээс олохтонуута тэтимириэ, ыччат дьон эргиччи сайдыа.
Төрдүһүнэн, биһиги Өлүөнэ эбэбит муостатын тутуллуута аан дойду болҕомтотун тардыаҕа.
Баараҕай тутуу олоххо киирэригэр эрэлим улахан.