АЭБ Бырабылыанньатын бэрэссэдээтэлин солбуйааччы Анатолий Табунанов сааһыттан хааччаҕа суох өрөспүүбүлүкэ бары олохтоохторугар үп-харчы боппуруоһугар билиилэрин-көрүүлэрин хаҥатарга туһаайан үлэ ыыталларын, тус уурунууну көрөн сөптөөхтүк туһаналларыгар, табатык толкуйдаан элбэтэргэ үлэлэһэллэригэр хас да сыл устатыгар сырдатыы ыытылларын этэр.
«Биһиги үп-харчы боппуруоһун оҕо эрдэттэн толкуйдуу, сыаналыы үөрэнэрэ наада диэн маннык үлэлэһэргэ быһаарынныбыт. Эрдэттэн ханнык баҕарар идэни, үлэни сыаналыы улааталларыгар такайар, араас быһыы-майгы үөскээтэҕинэ быһаарсар, толкуйдаан көрөр дьон буола үүнэн-сайдан тахсалларыгар баҕарабыт», — диир Анатолий Табунанов. АЭБ бырабылыанньатын бэрэссэдээтэлин солбуйааччы оскуолаҕа киириэн иннинээҕи саастаах оҕолор сылдьар тэрилтэлэрин кытары баан хардарыта сибээстээх үлэтэ сотору кэминэн үтүө түмүктээх буоларыгар эрэнэр.
Оҕолору олус интэриэһинэй уонну умсугутуулаах оонньуулар күүтэллэр. Холобур, кырачааннар быраас, атыыһыт, полицейскай, баан үлэһитэ буола оонньуу таарыйа үөрэниэхтэрэ.
«Биһиги кырачааннарбыт манна үөрүүнэн оонньуохтара. Кинилэр манна оонньуулларын сэргэ, тэҥҥэ, хардарыта бодоруһа, уопсай тылы түргэнник була, толкуйдуу-тобула үөрэниэхтэрэ. Биһиги бааҥҥа оҕолорбутугар туһалаах бэлэҕин иһин наһаа махтанабыт», — диэтэ Дьокуускай куорат «Остров сокровищ» 7 №-дээх муниципальнай оҕо саадын сэбиэдиссэйэ Майя Кириллина.