Быйыл Ил Дархан өрөспүүбүлүкэҕэ Ыччат сылын биллэрбитэ. Ыччакка аналлаах тэрээһин бөҕөтө ыытылынна. Онтон сылы түмүктүүр тэрээһин – Ыччат баала сарсын, ахсынньы 23 күнүгэр, Дьокуускайга буолуоҕа. edersaas.ru
Баал Суорун Омоллоон аатынан Опера уонна балет тыйаатырыгар буолуоҕа. Манна Саха сирин бары муннугуттан сыл устата бэйэтин көхтөөхтүк көрдөрбүт, ыччаты кытта үлэлээбит дьон кэлэн сылларын түмүктүөхтэрэ. Баал режиссера – Эстрада тыйаатырын продюсера, ырыаһыт Ульяна Ли-Фу – Күннэй. Ыччакка анаан Екатерина Тайшина салайар “Труппа 22” коллектива туруорбут ураты нүөмэрин көрдөрүөхтэрэ, Гоша Васильев – Jeedda, Кэскил Баишев, Алексей Филиппов, игирэчээн Кэскилээнэ, Кэрэчээнэ Туприналар, “Ый суола”, ”BreakOut”, “Snow Voise” бөлөхтөр уо.д.а. ыллыахтара-туойуохтара. Кэлбит ыалдьыттары тыйаатыр фойетыгар “Sreda” студия фотографтара босхо хаартыскаҕа түһэрэн, умнуллубат түгэни үйэтитиэхтэрэ.
Ыччат сылын түмүктэрин үгэскэ кубулуйбут номинацияларынан таһаарыахтара: “Ыччаты кытта үлэлиир бастыҥ исписэлиис”, “Ыччат сылын саҥа сүүрээнэ”, “Сыл наставнига”, “Сыл лидерэ”, “Сыл бастыҥ эдэр суруйааччыта”, “Ыччат сылын бастыҥ пресс-киинэ”, “Ыччат сылын суруналыыһа”, “Ыччат сылын бастыҥ эдэр суруналыыһа”, “Сыл бастыҥ ыччат тэриллиитэ”. Биирдиилээн бастыҥнары СӨ бырабыыталыстыбата, министиэристибэлэр наҕараадалыахтара, эҕэрдэлиэхтэрэ. Маны таһынан, баалга хоруолун уонна королеватын талыахтара.