Ытык-мааны Таатта сиригэр-уотугар күүтүүлээх, долгутуулаах күн үүннэ.
Бүгүн кэрэ-талба Баайаҕаҕа сүрэҕи-быары өрүкүтэр уос номоҕор киирбит туос Моҕол ураһаны арыйыы үөрүүлээх сиэрэ-туома ыытылынна. Сүргэни көтөҕөр ураты түһүлгэ тэрээһинигэр СӨ Ил Дархана Айсен Николаев ыалдьыттаата. Алгыс баһа сыаланна, уруй-айхал этилиннэ.
Туос Моҕол ураһаны оҥорор туһунан, саха норуотун духуобунай сирдьитэ, улахан ааттаах-суоллаах тимир ууһа Б.Ф.Неустроев — Мандар Уус иилээбитэ-саҕалаабыта, дьону-сэргэни көҕүлээбитэ. Кини ыллыктаах тылын ылынан, өрөспүүбүлүкэ улуустарыттан уран тарбахтаах 300 мааны иистэнньэҥ үөрүүнэн кыттыспыта, туос ураһа тигиитигэр соруктаахтык ылсыбыта.
Оттон бүгүн, Саха сиригэр өссө ханна да суох, Мандар Уус түстээбит бүттүүммүт киэн туттуута , норуот тутуута — мааны бэйэлээх Туос Моҕол ураһа баар буолла. Ыра санаа туолла, олоххо киирдэ. Манна, бу кэрэ, сырдык сиргэ, олохтоохтор этэллэринэн, этно-култуурунай комплекс тэриллиэ.
Хаартыскалар батсааптан