Ил Түмэн бүгүҥҥү пленарнай мунньаҕар дьокутааттар Ил Дархан Айсен Николаев Баай-дуол, сир сыһыаннаһыыларын миниистирин дуоһунаһыгар Евгения Григорьева кандидатуратын аныырыгар сөбүлэҥнэрин биэрдилэр.
Санатан эттэххэ, Ил Дархан бырабыыталыстыба бэрэссэдээтэлин, кини солбуйааччыларын уонна сүрүн миниистирдэри Ил Түмэнинэн бигэргэтэр.
Евгения Васильевна бу дуоһунаска 2011 с. анаммыта. Ол иннинэ миниистири солбуйааччынан үлэлии олорбута. Дьокутааттар миниистир эбээһинэһин толорооччуттан сир нолуогун, Уһук Илин эрэгийиэннэргэ бэриллибит биир гектар, сир үлэһиттэрин бэлэмнээһин тустарынан ыйыттылар. Евгения Васильевна уопуттаах миниистирин бэлиэтээн эттилэр.
Ыспыраапка:
Евгения Васильевна Григорьева
1965 с. атырдьах ыйын 19 күнүгэр Ньурбаҕа төрөөбүтэ;
1988 с. Ригатааҕы гражданскай авиация инженердэрин институтун үөрэнэн бүтэрбитэ;
1988-1990 сс. – Дьокуускайдааҕы гражданскай авиация управлениетын инженерэ;
1990-1991 сс. – “Якутстройзаказчик” өрөспүүбүлүкэтээҕи инвестиционнай-тутар тэрилтэ инженерэ;
1991-1992 сс. – “Якутинстеп” тэрилтэ сүрүннүүр инженерэ;
1992-1994 сс. – СӨ бэрэсидьиэнин уонна бырабыыталыстыбатын дьаһалтатын сүрүннүүр исписэлииһэ;
1994 с. – чааһынай нотариальнай хонтуораҕа юрист;
1995-1998 сс. – СӨ нотариальнай палататын нотариуһун көмөлөһөөччүтэ;
1998-2003 сс. – Судаарыстыбаннай регистрационнай палата бэрэссэдээтэлин солбуйааччы;
2003-2005 сс. – СӨ баайы-дуолу регистрациялыыр юстиция бэрэссэдээтэлин бастакы солбуйааччы;
2005-2007 сс. – Техническэй инвентаризация уонна баайы-дуолу учуокка туруоруу судаарыстыбаннай киинин дириэктэрэ;
2007-2011 сс. – Баай-дуол сыһыаннаһыытын миниистирин бастакы солбуйааччы;
2011 с. – Баай-дуол сыһыаннаһыытын миниистирэ.
Аграфена КУЗЬМИНА, “Саха сирэ” хаһыат.