Баай Байанайга анаммыт дьоро күн дьиэ кэргэни түмтэ...
Олох-дьаһах

Баай Байанайга анаммыт дьоро күн дьиэ кэргэни түмтэ

Байанай ыйа сахалар биир саамай сүгүрүйэр, ытыктыыр ыйбыт. Сиэри-туому тутуһар дьоҥҥо Баай Байанай мэлдьи көмөлөһөр, үтүөнү оҥорор диэн бигэ өйдөбүллээхпит.

edersaas.ru


Өбүгэбит сиэрин-туомун, дьарыгын кэнчээригэ иҥэрэргэ Дьокуускай куораттааҕы “Остуоруйа дойдута” оҕо саада болҕомтотун ууран үлэлэһэр. Манна Байанай ыйыгар аналлаах тэрээһин ыытыллара үтүө үгэскэ кубулуйда.

Саха тылыгар эбии үөрэхтээһин педагога Любовь Иннокентьевна Федорова  «Сир симэхтэрэ», «Изумрудный город», «Солнечные зайчики» бөлөхтөр оҕолоругар  уонна кинилэр төрөппүттэригэр анаан сэргэх тэрээһини тэрийдэ. Бастатан туран, оҕолор эрдэттэн кыһаллан-мүһэллэн оҥорбут оҥоһуктарынан “Байанай бэлэҕэ” диэн быыстапка буолла. Уруһуй куонкуруһугар оҕо барыта кыттан, сэмэй бэлэхтэри ытыс тыаһыгар доҕуһуоллатан туттулар. “Мин аҕам – булчут” хаартысканан коллаһы оҕолор төрөппүттэрин, иитээччилэрин кытта көмөлөөн оҥорбуттара улахан сэҥээриини ылла, болҕомтону тарта. Кырачааннар аҕалара, эһээлэрэ, убайдара эбэтэр дьиэ кэргэнинэн айылҕаҕа сынньана, балыктыы, бултуу сылдьар, кутаа оттор, чэй оргутар түгэннэриттэн хаартыскалары көрдөрө-көрдөрө ыалдьыттарга киэн тутта кэпсээтилэр. Салгыы бырааһынньыктыы киэргэтиллибит саалаҕа ытыс тыаһыгар доҕуһуоллатан  хоһоон аахтылар, ыллаан дьиэрэттилэр, үҥкүүлээн тэйдилэр.

Ол кэнниттэн, физкултуураҕа дьарыктыыр Марфа Петровна Константинова толкуйдаан тэрийбит киһини эрэ сэргэхситэр бэртээхэй күрэхтэһиитигэр илин-кэлин түсүһүү кытаанаҕа буолла.  Быһый бастыҥын быһаарсыы,  сымса бэрдэ буолуу, тобуллаҕас толкуйу көрдөрүү, дьэ, манна эбитин көрөөччүлэр билиннилэр. Ытыстарын тыаһынан кырачаан спортсменнары көҕүлээн биэрдилэр. Оҕолор бары да эрбии тииһин курдук эгил-тэгил киирсиилэриттэн ыалдьыттар улаханнык астыннылар, оҕолору хайҕаатылар.

Түмүккэ, өйдүү-саныы сылдьарга хаартыскаҕа түстүлэр. Төрөппүттэр оҕолорунуун бу тэрээһинтэн дуоһуйа сынньанан, оҕо саадын кэлэктиибигэр махтаннылар. Маннык хайысхалаах үлэ дьиэ кэргэн бөҕөргүүрүгэр, оҕо өбүгэ үгэһин билэ-көрө үөрэнэригэр, ытыктыы, сүгүрүйэ улаатарыгар улахан суолталааҕын бэлиэтээтилэр.

Сардаана БАСНАЕВА., «Саха сирэ» хаһыат,  edersaas.ru

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

четыре + 16 =