Тыа хаһаайыстыбатын министиэристибэтэ иһитиннэрэринэн, быйыл саас ыһыы үлэтэ 48,7 тыһ гектарга, ол иһигэр, бурдук 9,3 тыһ. гектарга, сүөһү сиир аһылыгын култуурата 30,2 тыһ. гектарга ыһыллыахтаах, хортуоппуй 7,3 тыһ. гектарга, оҕуруот аһа 1,7 тыһ. гектарга олордуллуохтаах.
edersaas.ru
Ыһыы үлэтигэр бэлэмнэнэн, хаһаайыстыбалар тиэхиньикэлэрин көрүнэн-истинэн, өрөмүөннээн итиэннэ суолу-ииһи өрүсүһэн сиэмэлэрин, уоҕурдууларын, уматыктарын таһыннылар. Билигин сир төһө куурарынан көрөннөр, бааһыналарга сиик саптарыытын саҕалаатылар. Ол курдук, ыам ыйын 15 күнүнээҕи чахчынан, бааһыналарга 23,9 тыһ. туонна уоҕурдууну киллэрдилэр, 481 гектар бааһынаҕа сиик саптардылар. Оттон оҕуруотчуттар 384,8 тыһ. кв. миэтэрэ иэннээх тэпилииссэни бүрүйдүлэр. Онон былааннарын 65 %-ын толордулар.
Саамай элбэх ыһыылаах Амма улууһун тыатын хаһаайыстыбатын управлениетын начальнига Ион Кононов этэринэн, үрдүк сиргэ сытар бааһыналардаах «Амматааҕы» АУо 100 гектардаах бааһына сиигин саптарбыт, оттон «Болугур», «Бөтүҥ» уонна «Соморсун» кэпэрэтииптэр сирдэрэ куурарын кэтэһэллэр. Бурдук ыһыытын быһа холоон, ыам ыйын 18 күнүттэн саҕалыыр былааннаахтар.
Хаҥалас улууһун хаһаайыстыбалара: «Хачыкаат» кэпэрэтиип, «Наука» ХЭУо уонна «Туймаада экоферма» (урукку «Нөмүгү» агрофирма) ХЭУо холбоон 356 гектардаах бааһына сиигин саптардылар. Быйыл хаар халыҥ буолан, бааһына сиигэ арыый хойутаан кууран эрэр диэн агрономнар этэллэр.
Раиса Сибирякова, «Саха сирэ» хаһыат, edersaas.ru