Үүнэр 2022 сыл илиҥҥи гороскобунан Баабыр сыла. Онно этиллэринэн, бу сылга төрөөбүттэр күүстээх, хорсун санаалаахтар, ис киирбэхтэр, элбэх дьону кытта тапсаллар, сатабыллаах салайааччылар, айылҕаттан айар талааннаахтар.
Николай Донской, ырыаһыт:
— Мин Баабыр сылыгар, 1974 cыллаахха төрөөбүтүм. Онон үүнэр сылга элбэх үгүс үөрүүнү кэтэһэбин. Кэлэн иһэр саргылаах Саҥа дьылы бары чэгиэн сылдьан үөрэ-көтө көрсүҥ диэн баҕа санаабын этиэм этэ. Дьаҥ-дьаһах этэҥҥэ аастар ханнык. Саҥа сылы саҥалыы көрсөн бары дьоллоох буолуҥ, сахам дьоно! Оттон мин саҥа сылтан эмиэ бары үчүгэйи эрэ кэтэһэбин. Киһи олорор эрэлинэн, киһи дьоллонор кыраттан да. Дьол-үөрүү эрэ кэллин. Баабыр кыыл үтүө өрүттэрин эрэ көрдөрөн, барыбытыгар ситиһиини эрэ аҕаллын.
Павел Семенов-Байбал, эстрада тыйаатырын артыыһа, ырыаһыт:
— Бэйэм сылым буолан Баабыр сылын кэтэспитим ыраатта. Дойдубар Саҥа дьыллаабатаҕым быданнаата. Кэлин үксүн куоракка, киин улуустарга көрсөбүн. Онон үүнэр 2022 сылы кырдьаҕас ийэбин кытта дойдубар Бүлүүгэ көрсөр былааннаахпыт. Кулуупка тиийэн дьоммор-сэргэбэр ыллыам-туойуом, эҕэрдэлээн ааһыам.
Зодиагы үөрэтэн көрбүт суох эрээри, нумерологтар этэллэринэн, бэлиэтээн көрдөххө, сылым бэйэбэр син сөп түбэһэр быһыылаах: айылҕа биэрбит талаана, дьүһүнүм, майгым.
Айар кэнсиэрбин сыллата тиһигин быспакка, сорох сыл иккилиитэ тэрийэбин. Ол гынан баран, үбүлүөйдээх кэнсиэрбин оҥоруохтааҕым коронавирус дьаҥынан сибээстээн, табыллыбата. Үбүлүөйдээх да буолбатар, үүнэр сылга күһүн, табылыннаҕына, алтынньыга бар дьоммор кэнсиэрбин бэлэхтиир былааннаахпын.
Киһи инникини тымтыктанан көрбөт, билигин олохпут даҕаны бэрт түргэнник уларыйар, эрдэ былааннаммыт кыайан олоххо киирбэккэ хаалара баар. Онон түгэн, кыах көһүннэҕинэ, эрдэ былааннаммыты олоххо киллэрэргэ дьулуһар ордук. Быстах тус толкуйдар элбэхтэр.
Сахаайа, эстрада тыйаатырын артыыһа, ырыаһыт:
— Мин Баабыр сылыгар төрөөбүтүм, онон бэйэм сылбын наһаа күүтэбин. Тоҕо диэтэххэ, бу сыл наһаа үчүгэй буолуо дии саныыбын. Баабыр наһаа хорсун, өйдөөх, чиэһинэй бэлиэ буолар. Баабыр диэн лиидэр, бар дьону кытта табан сыһыаннаһар ураты бэлиэ буолар. Онон бары бэлиэлэргэ ситиһиилээх сыл буолуоҕа. Баабыр куһаҕантан араҥаччылыыр, көмүскүүр эбит, ити былыр-былыргыттан баар итэҕэл эбит. Онон баабыр бары куһаҕантан көмүскүөҕэ. Бу дьаҥы-дьаһаҥы тэйитиэ этэ. Ыарыы, дьаҥ аччыыра буоллар, бары төһөлөөх дьоллонуо, үөрүө этибитий. Бу ааһан эрэр уонна ааспыт 2020-2021 сыллар наһаа уустук этилэрэ. Элбэх доҕотторбутун, чугас дьоммутун сүтэрдибит. Онон саҥа сыл саҥа саҕахтары арыйыа этэ диэн эрэнэбин. Бары чэгиэн буолуҥ, үөрэ-көтө саҥа сылы көрсүөҕүҥ!
Олег Марков, «Саха» НКИХ генеральнай дириэктэрэ:
— Ити илиҥҥи да, арҕааҥҥы да гороскоптары улаханнык сэҥээрбэт киһибин ээ. Ол эрэн, Баабыры кыра оҕо эрдэхпиттэн олуһун ытыктыы, сөбүлүү көрөр кыылым буолар. Уһук Илиҥҥэ эрэ буолбакка, аан дойду үрдүнэн күүһүнэн, көстүүтүнэн аатырбыт улуу кыыл буоллаҕа дии! Баҕар, төрөөбүт сылым бэлиэтэ буолан итинник сыһыан үөскээтэҕэ буолуо?
Кэлэр сыл Сахабыт сиригэр улахан суолталаах, Өрөспүүбүлүкэбит 100 сааһын бэлиэтиир сылбыт буолар. Бу бэлиэ олугу дьоһуннук бэлиэтээн, кэлэр үйэҕэ былааммытын тэринэн, инники олохпутугар эрэллээхтик үктэнэрбитигэр баҕарыам этэ. Уонна, биллэн турар, хамсык симэлийэн, хааччахтар уурайаннар, бары эйэ дэмнээх олохпутугар төннөрбүтүн бар дьоммун кытта бииргэ олуһун күүтэбин. Ыарыы халбарыйдын, дьол-соргу тосхойдун! Кэлэр сыл үөрүүлээх сонуннары эрэ аҕаллын!
Күннэй, мелодист, ырыаһыт:
— Бэйэҕин ханнык эрэ харамай уратытыгар холоон көрүү биир өттүттэн көрдөөх, биир өттүттэн толкуйдатар дьарык. Бэйэм олоҕум тухары куоскалары (дьиэ да куоската буоллун, айылҕа адьырҕа кыыла да буоллун) олуһун сөбүлүүбүн, арааһа, сылым Баабыр буолан уруурҕуу көрөрүм буолуо? Билгэлэргэ соччо итэҕэйбэппин эрээри, холобур, ааспыт Баабыр сылыгар – 2010 сылга мин улахан сольнай кэнсиэрбин оҥорбутум уонна биһиги дьиэ кэргэн кыбартыыра атыыласпыппыт, улахан суолталаах сыл этэ диэхпин сөп.
Баабыр сыла хара, оранжевай, көмүс дьүһүнү өрө тутар дииллэр. Бэйэм бу диэн биһириир дьүһүнүм суох эрээри, мин уобараспын оҥорор дьонум ити дьүһүннэри миэхэ ордук дьүөрэлииллэр. Холобур, соторутааҕыта Москваҕа Ньургуйаана Яковлева көҕүлээһининэн килиип устубуппут. Онно сүрүннүүр өҥ быһаарыыта ити дьүһүннэринэн оҥоһуллубута. Дьиҥэр, өйбүтүгэр ити леопард өҥнөрө этэ эрээри, чугаһатан эттэххэ, кини даҕаны Баабыр аймаҕа буоллаҕа дии?
Хамсык барыбытын бэрт күүскэ тургутан көрдө, тулуурдаах, күүстээх оҥордо. Онон түһүү санааны киэр илгэн, саҥа чыпчаалларга дабайыаҕыҥ! Биһиги ситиһиилэрбитин сиэннэрбит хайгыы көрөллөрүн курдук туттунуоҕуҥ! Барыгытыгар Саҥа дьылынан эҕэрдэ буоллун!
edersaas.ru