Быйыл биир саамай бөдөҥ уопсастыбаннай тэрилтэ – Арассыыйа бааһынай хаһаайыстыбаларын уонна тыа хаһаайыстыбатын кэпэрэтииптэрин ассоциацията (АККОР) 30 сылын туолар.
edersaas.ru
АККОР састаабыгар 93 тыһыынча бааһынай хаһаайыстыбатын уонна тыа хаһаайыстыбатын кэпэрэтииптэрин түмэр 69 эрэгийиэннээҕи сойуус уонна ассоциация баар. Манна өссө Тыа сирин дьахталларын хамсааһына итиэннэ тыа сирин кирэдьииттиир кэпэрэтииптэрин Сойуустара эбиллэр. АККОР тэриллибитэ отут сыллаах үбүлүөйүн чэрчитинэн, Москваҕа олунньу 18-19 күннэригэр АККОР XXXI сийиэһэ ыытыллар.
Сийиэскэ дойду 70 эрэгийиэниттэн 700 дэлэгээт кыттыаҕа. Саха Өрөспүүбүлүкэтиттэн тыа хаһаайыстыбатын миниистирин солбуйааччы Татьяна Осипова уонна АККОР Саха сиринээҕи салаатын бэрэсидьиэнэ Александр Артемьев салалталаах дэлэгээссийэ барда. Олохсуйбут үгэс быһыытынан, сийиэс сүрүн күнүн иннинэ, ол эбэтэр олунньу 18 күнүгэр сарсыарда 11 чаастан Тыа хаһаайыстыбатын министиэристибэтин, “Россельхозбаан”, “Росагролизинг” хампаанньалар уо.д.а. биэдэмистибэлэр бэрэстэбиитэллэрин кытары сүбэ мунньах, күнүстэн киэһэ АККОР Сэбиэтин мунньаҕа буолуохтара. Сийиэс пленарнай мунньаҕа олунньу 19 күнүгэр сарсыарда 10 чаастан ыытыллыаҕа.
Раиса Сибирякова, «Саха сирэ» хаһыат, edersaas.ru