Бааһынай хаһаайыстыбалары уонна тыа сирин урбаанын сайыннарыыга 287 мөлүйүөн көрүллүөҕэ

Муус устар ый бүтүүтүгэр Арассыыйа Бырабыыталыстыбатын Бэрэссэдээтэлэ Дмитрий Медведев федерация бүддьүөтүттэн эрэгийиэннэр бааһынай хаһаайыстыбалары уонна тыа сирин урбаанын сайыннаралларыгар үбү көрөр туһунан дьаһалга илии баттаата.

edersaas.ru

Онон үс сыл устата дойду 83 субъегар барыта 14 миллиард солкуобай көрүллэрэ былааннанна: быйыл 5,37 млрд, 2020 сылга — 3,84 млрд, 2021 сылга 4,61 млрд  солкуобай. Бу иһиттэн Саха Өрөспүүбүлүкэтигэр бааһынай хаһаайыстыбалары уонна тыа сирин урбаанын сайыннарыыга үс сыл устата федерацияттан 287 мөлүйүөн солкуобай харчы бэриллиэҕэ. Быйыл 95,8 мөлүйүөн, эһиил 103,8 мөлүйүөн, 2021 сылга 87,5 мөлүйүөн.
Бу быһаарыы «Дьоҕус уонна орто урбаан итиэннэ биирдэм урбаан көҕүлээһинин өйөөһүн» диэн национальнай бырайыакка киирэр «Бааһынай хаһаайыстыбалары өйөөһүн уонна тыа сирин кэпэрээссийэтин сайыннарыы» федеральнай бырайыак чэрчитинэн ылыныллыбыт.

Раиса СИБИРЯКОВА, «Саха сирэ» хаһыат, edersaas.ru