Бааһынай хаһаайыстыбалар уонна кэпэрэтииптэр үүммүт сылы торумнаатылар
СӨ Тыатын хаһаайыстыбатын министиэристибэтигэр Бааһынай хаһаайыстыбалар уонна тыа хаһаайыстыбатын кэпэрэтииптэрин ассоциацияларын сэбиэтэ мунньахтаата.
edersaas.ru
Мунньахха сэбиэт чилиэннэрэ, улуустар бэрэстэбиитэллэрэ, «Россельхозбаан» филиалын дьоҕус уонна орто биисинэс үлэтин отделын начальнига Николай Соловьев уонна СӨ тыатын хаһаайыстыбатын министиэристибэтин, сүөһү иитиитин, племенной үлэтин уонна кэпэрэтииптэри кытта үлэ Департаменын салаайааччытын солбуйааччыта Айаал Тимофеев кыттыыны ыллылар.
Мунньах кыттыылаахтара бааһынай хаһаайыстыбалар уонна тыа хаһаайыстыбатын кэпэрэтииптэрэ 2021 сыллаах үлэлэрин торумнастылар. Ассоциация бу сыллаах үлэтин былааннаатылар уонна быйыл ыытыллыахтаах 30 сыллаах үбүлүөй тэрээһинин ырыттылар.
Түмүккэ СӨ Бааһынай хаһаайыстыбаларын уонна кэпэрэтииптэрин президенэ Александр Артемьев бастыҥ көрдөрүүлээх пиэрмэрскэй хаһаайыстыбалары наҕараадалаата.
Пиэрмэрскэй хамсааһын сайдыытыгар көхтөөх кыттыыларын иһин, «СӨ Тыатын хаһаайыстыбатын туйгуна» диэн бэлиэнэн Розалия Романовна Петрова, Хаҥалас улууһун бааһынай хаһаайыстыбалааҕа уонна Дмитрий Васильевич Смирников Чурапчы улууһун бааһынай хаһаайыстыбалааҕа наҕараадаланнылар.
Уус Алдан улууһун бааһынай хаһаайыстыбалааҕа Дмитрий Васильевич Илларионов «СӨ бааһынай хаһаайыстыбаларын ассоциациятын үтүөлээх пиэрмэрэ» ааты сүктэ.
Маны таһынан, өрөспүүбүлүкэ пиэрмэрскэй хамсааһынын пропагандалааһынын уонна улахан кылаатын иһин «Арассыыйа бочуоттаах пиэрмэрэ» ааты Прокопий Алексеевич Хабаров, «Саха» НКИХ радиотын редактора ылла.
СӨ Тыатын хаһаайыстыбатын министиэристибэтин пресс-сулууспата.