Таатта улууһугар бу күннэргэ илин эҥээр муниципальнай тэриллиилэрин баһылыктарын семинара ыытыллыбыта. Тэрээһин кэнниттэн баһылыктар Таатта улууһун туһунан санааларын үллэһиннилэр.
edersaas.ru
Николай Старостин, Мэҥэ Хаҥалас улууһун баһылыга:
— Тааттаҕа саха судаарыстыбаннаһын турууласпыт, төрүттээбит, көмүскээбит бөдөҥ уопсастыбаннай, бэлитиичэскэй деятеллэр, норуот тылын-өһүн, култууратын сурукка киллэрбит талааннаах суруйааччылар үүнэн-үөскээн тахсыбыттара. Онон Таатта дьоно саха саргытын түстээбит биир дойдулаах убайдарын сыдьааннара буолан, кинилэр кэриэс тылларын олоххо киллэрэр, кинилэр дьыалаларын салгыыр ураты аналлаахтар.
Варвара Макарова, Чурапчы улууһун Болтоҥо нэһилиэгин баһылыга:
— Таатта улууһа – саха киһитигэр патриотическай тыыны иҥэриигэ, үөскэтиигэ, саха култууратын, национальнай силиһин түгэҕэр тиийэ илдьэ сылдьарынан барыларыттан ураты дии саныыбын. Манна олорон ааспыт, саханы саха дэппит баһылыыр-көһүлүүр дьон күүстээх тыыннара билиҥҥи ыччаттарыгар биллэр курдук.
Алексей Кононов, Амма улууһун Соморсун нэһилиэгин баһылыга:
— Таатталар тыа хаһаайыстыбатыгар өрөспүүбүлүкэҕэ бастакы күөҥҥэ сылдьаллар. Бэйэ бородууксуйатын оҥорон дохуоту элбэтиигэ, тыа хаһаайыстыбатын саҥа эбийиэктэрин олоххо киллэриигэ, саҥа технологиялары баһылааһыҥҥа үгүс үлэни ыыталлар. Быйыл бырабыыталыстыба сорудаҕын толорууга оттооһуҥҥа бастакылар истэригэр сылдьаллар.
Владимир Петров, Уус Алдан улууһун Курбуһах нэһилиэгин баһылыга:
— Таатталар олус түмсүүлээхтэр. Ханнык да түгэҥҥэ бары саба түһэннэр, хайдах да дьыаланы быһаара охсубуттара эрэ баар буолар. Биир идея, санаа тула сомоҕолоһо түһэннэр, кыайыылаах тахсаллар. Эһиги ыытар үлэҕитин интэриниэт нөҥүө билэ-истэ олоробут. Курбуһах нэһилиэгэ Тааттаттан чугас сытар. Манна Тааттаҕа Курбуһахтан ыччаттарбыт кийиит, күтүөт буолан кэлэн олороллар. Уус Тааттаҕа эдэр исписэлиис Васильевтар дьиэ-кэргэн үлэлии-хамсыы сылдьар.
Анна Яковлева, Таатта, «Эдэр саас» сайтка анаан.