Тохсунньу 18-19 күннэригэр Дьокуускай куоракка муниципальнай тэриллиилэр VII съезтэрэ ыытыллыаҕа. Ол чэрчитинэн улуус, нэһилиэк баһылыктара бары мустан Ил Дархан Егор Борисовы кытары көрсүөхтэрэ.
Санатан эттэххэ, маннык көрсүһүү үгэскэ кубулуйда. Былырыыҥҥы көрсүһүүгэ олохтоох оҥорон таһаарыыны сайыннарыы, бүддьүөтү хаҥатыы боппуруостара турбут буоллахтарына, быйыл үлэнэн хааччыллыы, нэһилиэнньэ дьарыктаах буолуутун кэпсэтэллэрэ күүтүллэр.
Съезд чэрчитинэн ыытыллар семинарга баһылыктар тыа хаһаайыстыбатын, үп, тырааныспар миниистирдэрин дакылаатын истиэхтэрэ. Ону сэргэ дьарыктаах буолуу, саҥа үлэ миэстэтин тэрийии, коммунальнай хаһаайыстыба, сыана, тарыып, баһаартан сэрэхтээх буолуу боппуруостарын кэпсэтиэхтэрэ.
Ил Түмэн олохтоох салайыныыга сис кэмитиэтин бэрэссэдээтэлэ Василий Местников этэринэн, баһылыктарга бу тэрээһин улахан суолталаах.
“Делегаттар быйылгы съезкэ үлэнэн хааччыллыы боппуруоһун көрөллөрө, ити тула кэпсэтэллэрэ буоллар тоҕоостоох буолуо этэ. Кистэл буолбатах, билигин үлэ суох диэн баран ыччаппыт киин сиргэ талаһар. Тыа сиригэр ыччаты олохсутар, үлэнэн хааччыйар, үлэ миэстэтин таһаарар туһунан кэпсэтии барарын күүтэбит», — диэн этэр кини.
Тэрээһин Өксөкүлээх Өлөксөй аатынан Норуоттар доҕордоһууларын дьиэтигэр ыытыллыаҕа.
Аграфена КУЗЬМИНА, “Саха сирэ” хаһыат, edersaas.ru