Бу күннэргэ муниципальнай тэриллиилэр баһылыктарын сийиэһэ буолаары турдаҕына, улуус баһылыктарыгар араас хайысхалаах бырайыактары олоххо киллэриигэ туһуламмыт дьыалабыай оонньуу буолан ааста.
ederdsaas.ru
Бу туһунан «Өймөкөөн улууһа» МТ баһылыга Михаил Захаров бу курдук кэпсиир:
— Баһылыктар «Ленские зори» санаторий базатыгар олорон, икки хонук устата 8-тыы киһилээх хамаандаларга арахсан, тирээн турар сытыы боппуруостары быһаарар бырайыактары оҥорон көмүскээтибит.
Биһиги хамаандабыт «Суол уонна аччыгый авиация» диэн бырайыагы көмүскээтэ. Бырайыакка үлэлиир кэммитигэр хас биирдиибитин психологтар үөрэттилэр, экспердэр үлэбитин сыаналаатылар.
Маннык практическай үөрэх хас биирдии тустаах быһаарыыны эрэйэр боппуруоска сөптөөх хоруйу тобуларга олус туһалаах.
Биһигини кытта үлэлэспит модераторбыт бөлөхпүт састаабын: «Олус күүстээх, тобуллаҕас толкуйдаах дьон», — диэн сыаналаата. Уонна: «Бэйэҕит улуустаргытыгар маннык бырайыактыыр ньыманан үлэлээҥ», — диэн баҕа санаатын тиэртэ. Онон улууспутугар салайааччыларга маннык хайысхалаах дьыалабыай оонньууну хайаан да ыытыыһыбыт диэн санааҕа кэллим.
Кырдьык да, уопсай сүбэнэн араас уустук боппуруостары быһаарыыга бу маннык бырайыактары оҥоруу олус туһалааҕа чахчы.
Елена ПОТОЦКАЯ, «Саха сирэ» хаһыат, edersaas.ru
Хаартыска Михаил Захаров архыыбыттан.