Баһылай Саабын сандал сааһа

Ааптар: 
Бөлөххө киир:

Саха дьонун ураты тыллардаах хоһоонунан умсугуппут бэйиэт Баһылай Саабын төрөөбүтэ 80 сылынан Уус Алдан улууһугар, Дүпсүҥҥэ, бэрт сэргэх тэрээһин буолла. Бу туһунан биһиэхэ Дүпсүн орто оскуолатыгар дириэктэри үөрэх чааһыгар солбуйааччы Ньургуйаана Сивцева кэпсээтэ.


Тэрээһини оскуолабыт “Төрөөбүт дойдубар тапталым” бырайыагын чэрчитинэн тэрийэн ыыттыбыт. Манна Чэриктэйтэн, Дүпсүнтэн кэлэн кытыннылар. Куонкурустар түһүлгэҕэ мустубут дьон болҕомтотун тартылар.  

Бастатан туран,  “Василий Саввин олоҕо, айар үлэтэ” тобуллаҕас өй күрэхтэһиитигэр оскуолалар алталыы киһилээх хамаандалара күрэхтэстилэр. Түмүккэ, Чэриктэй оскуолатын хамаандата бастаата. Дүпсүн иккистээтэ.

Хоһоон ааҕыытын куонкуруһа бэрт сэргэх буолла. 1-4 кылаас үөрэнээччилэригэр 17 оҕо кытынна. Түмүккэ 1 миэстэни В.Стручкова, В.Сивцева ыллылар. Иккис бириистээх миэстэҕэ  2 кылаас үөрэнээччитэ Р.Тордуянов, үһүскэ Д.Атласова таҕыстылар.  Маны сэргэ, биһирэбил бириистэр туттарылыннылар.

5-7 кылаас үөрэнээччилэрин ортотугар  Дүпсүн о.о. 6 кылааһын үөрэнээччитэ Э.Соловьев  кыайыылааҕынан таҕыста. Бу оскуола 7 кылааһыгар үөрэнэр М.Алексеев иккистээтэ, 5 кылааска үөрэнэр А.Сивцева үһүстээтэ.  

8-11 кылаастарга  Л.Бурнашева (Чэриктэй о.о. 9 кыл.) – 1 м.,  Т.Шергина (Дүпсүн о.о. 10 кыл.) – 2 м.,  Д. Атласова (Дүпсүн о.о. 8 кыл.).– 3 м.

Улахан дьоҥҥо  1 миэстэни  Чэриктэй о.о. учуутала М.Иванова, иккиһи Дүпсүн о.о. учуутала А. Макарова ыллылар.

Тылбаас куонкуруһа сонун буолла. Манна уон киһи кытынна. Бастакы бөлөххө кыайыылааҕынан  Т.Шергина таҕыста. Иккиһи  Д.Румянцев, үсүһү Е.Дорофеев ыллылар. Иккис бөлөххө И.Алексеева бастаата.  Д.Потапова иккиһи,  А.Нестерова үсүһү ыллылар.

Салгыы В.В.Саввин ырыа буолбут хоһооннорун толоруулара сүрэҕи-быары долгутта. Бу кэнниттэн бэйиэккэ анабыл хоһооннор болҕомтону тартылар. Манна улахан дьон кытыннылар. Түмүккэ  1-2 миэстэлэри  М.Ховрова, А.Сивцева, 3 миэстэни В.Приыбылых ыллылар.

Баһылай Саабын айымньыларынан уруһуй куонкуруһун мустубут ыалдьыттар улаханнык сэҥээрдилэр. Манна бастакы бөлөххө чэриктэйдэр күннээтилэр.  Д.Федорова бастаата, иккиһи В.Сазонова, үсүһү К.Попов ыллылар. Иккис бөлөххө Д.Сивцева (Дүпсүн) бастакы миэстэ, С.Кривошапкин (Чэриктэй) иккис, А.Соловьева (Дүпсүн) үһүс миэстэ. Үһүс бөлөххө  дүпсүннэр кыайыы өрөгөйүн туттулар. М.Кудрин бастаата, С.Сивцева иккистээтэ.

Тэрээһиҥҥэ мустубут дьон таптыыр бэйиэппит олоҕун, үлэтин туһунан быыстапканы улаханнык сэҥээрэн, сэргээн көрдүлэр-иһиттилэр. Санааларын үллэһиннилэр. 

Василий Саввин бииргэ төрөөбүт эдьиийэ, үлэ, тыыл бэтэрээнэ, Дүпсүн нэһилиэгин бочуоттаах олохтооҕо Анна Саввина дьиэ кэргэнин кытары кэлэн ыалдьыттаабыта биир саамай долгутуулаах, умнуллубат түгэнинэн буолла. Анна Васильевна төрөппүттэрин, быраатын туһунан истиҥник ахтан-санаан кэпсээбитин саалаҕа олорооччулар наһаа кэрэхсээн, сөбүлээн  иһиттилэр. Салгыы бэйиэт доҕоро, скульптор, СӨ искусствотын үтүөлээх диэйэтэлэ, суруйааччы Василий Бочкарев Дьокуускайтан видеонан эҕэрдэлээтэ. Бэлиэ күҥҥэ ыытыллыбыт куонкурустарга оҕолуун, улахан дьоннуун барыта 60-ча киһи кытынна, — диэн кэпсээтэ Ньургуйаана Алексеевна.

Түмүккэ күргүөмүнэн хоһоон ааҕыыта ытыс тыаһынан доҕуһуолламмыт. Тэрээһини Дүпсүн орто оскуолата, “Тэгил” методическай холбоһук, нэһилиэк бибилэтиэкэтэ, “Дүөндү” сынньалаҥ киинэ тэрийбиттэр.

Биһиги корр., “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0