Саха сиригэр баһаартан көмүскүүр тэрилтэ төрүттэммитэ 200 сылыгар аналлаах “Баһаарынай охрана” компетенцияҕа устудьуоннарга аан маҥнайгытын өрөспүүбүлүкэҕэ биирдиилээн бастыыр иһин куонкурус буолан ааста.
Куонкурус устудьуоннары талан ылбыт идэлэригэр сыһыарар, таһымнарын үрдэтэр уонна баһаартан куттал суох буолуутун сэрэтэр, бастыҥ устудьуону быһаарар сыалтан тэрилиннэ.
Манна баһаартан сэрэхтээх буолууга үөрэнэр Ньурба, Чурапчы кэллиэстэрин, Светлинскэй (Мииринэй) индустриальнай, Үөһээ Бүлүү, Уус Алдан, Жатай техникумнарын, Горнай-геологическай техникум Харбалаахтааҕы (Таатта) филиалын устудьуоннара, уопсайа, 28 киһи кытынна.
Күрэхтэһии икки күн устата барда. Маҥнайгы күн баһаартан сэрэхтээх буолууга тест (бэлэм эппиэттэн биири талыы) толордулар. Иккис күн, ЫБММ СӨ кылаабынай управлениетын кризиснэй түгэннэргэ управлениетын киинин анал үөрэтэр, дьарыктыыр сирдэригэр мэһэйдэри туорааһыҥҥа итиэннэ штурмовой кирилиэһинэн тахсыыга куоталастылар. Төһө да бастакы куонкурус буолбутун иһин, “маҥнайгы хараҥаччылар” ити курдук уустук тургутуулары аастылар. Бэрт сытыы, тыҥааһыннаах куоталаһыы кэнниттэн кыргыттарга уонна уолаттарга тус-туспа үс бастыҥ миэстэлэри быһаардылар. Ол курдук, уолаттарга үс бастакы миэстэни Чурапчытааҕы кэллиэс устудьуоннара, туһааннааҕынан Любомир Сыромятников, Александр Ефипанов, Михаил Дьячковскай үллэһиннилэр. Онтон кыргыттарга Мария Винокурова бастакы, Августина Егорова иккис (иккиэн Чурапчы кэллиэһиттэн), Виктория Маркова үһүс миэстэ буоллулар. Ону таһынан “Штурмовой кирилиэһинэн тахсыыга бастыҥ көрдөрүү” иһин анал бирииһи Роман Грибков, “Мэһэйдэри туорааһыҥҥа бастыҥ көрдөрүү” иһин анал бирииһи Виктория Маркова ыллылар. Кинилэр иккиэн Жатайдааҕы техникумҥа үөрэнэллэр. Анал бириистэри СӨ Баһаары утары судаарыстыбаннай сулууспата туруорда.
Саха сирин историятыгар көмүс буукубанан суруллар маҥнайгы куонкуруһу Олоххо куттал суох буолуутун хааччыйар судаарыстыбаннай кэмитиэт, СӨ Үөрэҕин уонна наукатын министиэристибэтэ, СӨ Баһаары утары охсуһар судаарыстыбаннай сулууспата итиэннэ баһаарынайдары бэлэмниир тирэх үөрэх кыһата – Чурапчытааҕы кэллиэс кыттыһан тэрийдилэр. СӨ ЫБММ кризиснэй түгэннэргэ управлениетын киинин үлэһиттэригэр (дириэктэр Г.И.Захаров) баһырхай көмөлөрүн иһин махталларын биллэрэллэр.
“Баһаартан сэрэхтээх буолуу үөрэҕэ Саха сиригэр 2012 сылтан эрэ арыллыбыта. Онон устудьуоннарга аналлаах итинник хабааннаах куонкурустар букатын тарбахха баттаналлар. Маҥнай, устудьуоннары үлэһиттэри кытта күрэхтэһиннэриэхпитин баҕарбыппыт. Ол эрээри, үлэһиттэр кэккэ биричиинэнэн кыайан кыттыбатылар. Күрэхтэһии – үөрэнээччилэргэ быраактыка биир көрүҥүнэн, көҕүлүүр күүһүнэн буолар. Устудьуоннары үлэҕэ ылыахтаах дьон бэйэлэринэн кэлэн көрөллөр-истэллэр. Инникитин күрэхтэһии үлэҕэ ылыы биир түһүмэҕин быһыытынан систиэмэ олохтоннор үчүгэй этэ. Маҥнай оскуола үөрэнээччилэрин бэлэмнээн, салгыы биһиэхэ үөрэттэрэн, кинилэртэн бастыҥнары талаллара буоллар, букатын сүүмэрдэммит хамаанда тэриллиэх этэ”, — диэн Чурапчытааҕы кэллиэс дириэктэрэ Евгений Попов санаатын үллэстэр.
Маннык куонкурустар устудьуоннар инникитин идэлэрин дэгиттэрдик баһылыылларыгар көмөлөөх буолуо диэн салайааччылар бэлиэтииллэр. “Ворлдскиллс” Саха сиринээҕи дириэксийэтин салайааччыта Владислав Хабаров ыччаттары бэлэмнээн, “Ворлдскиллс” чөмпүйэнээккэ кытыннарыахха сөп этэ диэн эттэ.
Людмила ПОПОВА, “Саха сирэ” хаһыат, edersaas.ru