Бу күннэргэ, Саха Өрөспүбүлүкэтин бырабыыталыстыбатын бэрэссэдээтэлин бастакы солбуйааччы Алексей Колодезников салалталаах анал бөлөх Саха сирин баһаарынай сулууспатын бэрэбиэркэлиир үлэтин саҕалаабыта. Ол кэннэ, муус устар 18 күнүгэр Саха Өрөспүүбүлүкэтин баһаарынай сулууспатын салайааччыта Николай Иванов бэйэтин баҕатынан үлэтиттэн уурайда.
Санатан эттэххэ, Кангаласс бөһүөлэгин 10-с нүөмэрдээх баһаарынай чаас үлэһиттэрэ бырачыастаабыттара. Кинилэр баһаарынай сулууспа салалтата хамнаһы ситэри төлөөбөт, босхо эбии үлэлэтэр уонна уот умулларарга кэтиллэр анал таҥас ситэ бэриллибэт диэн айдаарбыттара. Бу кыһалҕаны быыһаарар соруктаах Саха Өрөспүүбүлүкэтин бырабыыталыстыбатын бэрэссэдээтэлэ Евгений Чекин бырабыыталыстыба бэрэссэдээтэлин бастакы солбуйааччы Алексей Колодезников салалталаах бэрэбиэркэни ыытар анал бөлөх тэрийдэ.
Муус устар 17 күнүгэр, Алексей Колодезников бастакы мунньаҕын ыыппыта. Ол күн баһаарынайдар бырачыастара тохтообута.
«Бастакы бэрэбиэркэлээһин түмүгүнэн, хас да кэһии тахсыбыта быһаарылынна. Ол курдук, үлэһиттэри эбии төлөбүрэ суох үлэлэтии уонна баһаар умулларыытыгар доруобуйаны харыстыыр таҥаһынан хааччыйыыга элбэх боппуруос баар. Маны таһынан, Саха Өрөспүүбүлүкэтин үп-харчы министиэристибэтэ Саха Өрөспүүбүлүкэтин баһаарынай сулууспатын бэрэбиэркэлии сылдьар. Хамыыһыйа ыйы супту үлэлиэҕэ. Бэрэбиэркэ түмүгүнэн, миэрэ ылыныллыаҕа»,— диир Алексей Колодезников.
Бэрэбиэркэ бүтүөн да иннинэ, Саха Өрөспүүбүлүкэтин баһаарынай сулууспатын салайааччыта Николай Иванов муус устар 18 күнүгэр бэйэтин баҕатынан уурайда диэн Алексей Колодезников эбии иһитиннэрдэ.
Николай Попов, «Саха сирэ» хаһыат, edersaas.ru