Саха сиригэр иккис сылын «Предупреди пожар – установи АДПИ” диэн социальнай аахсыйа ыытыллар. АДПИ диэн – буруо сытын ыллаҕына, улаханнык тыаһыыр, баһаары сэрэтэр тэрил.
Аахсыйаҕа кыттар киһи бу маннык тэрили ылан, соҕотох олорор кырдьаҕастарга, инбэлииттэргэ, элбэх оҕолоох ыалларга дьиэлэригэр туруорар уонна хаартыскаҕа түһэрэн, социальнай ситимнэргэ таһаарар, этсафетаны атын киһиэхэ салгыы ыытар.
Бу маннык тэрил баһаар саҥа саҕаланан эрдэҕинэ, тыаһаан-ууһаан дьону уһугуннарар, онон дьиэни-уоту, дьон олоҕун да быыһыан сөп. Чааһынай дьиэҕэ барытыгар маннык баарар ордук.
Нэһилиэнньэ куттала суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков Дьокуускайга олорор элбэх оҕолоох Артемьевтарга АДПИ-ны туруорбута. Салгыы эстафетаны Олох-дьаһах, хомунаалынай хаһаайыстыба, энэргиэтикэ миниистирэ Вячеслав Емельяновка, Баһаары утары судаарыстыбаннай сулууспа начаалынньыга Руслан Босиковка уонна Булуҥ улууһун баһылыга Афанасий Андросовка биэрбитэ.
Таймылыырга бара сылдьан, Булуҥ улууһун баһылыга Афанасий Андросов үлэ бэтэрээнэ Елизавета Боткинова уонна элбэх оҕолоох Павловтар дьиэ кэргэттэригэр АДПИ туруорда. Эстафетаны салгыы Хара Уулаах нэһилиэгин баһылыга Василий Балановка уонна Тиксии бөһүөлэгин баһылыга Наталья Султановаҕа ыытта.
2021 сылга аахсыйаҕа 750 киһи кыттыбыта. Бырайыак көмөтүнэн 1850 анал тэрил туруоруллубут.
Ангелина Васильева, “Саха сирэ” хаһыат, edersaas.ru