Бүлүү сиригэр баар баһаардар нэһилиэнньэлээх пууннарга киирэр кутталлара үөскээри гыммытыгар, улуустааҕы суһал штаб бэрэссэдээтэлэ, улуус баһылыгын бастакы солбуйааччы Иван Евсеев нэһилиэнньэҕэ ыҥырыы оҥорбута.
Баһаардары умуруорууга туох күүс түмүллүбүтүн, эбии дьон наадатын быһааран, улуус олохтоохторо көмөлөһөллөрүгэр ыҥырбыта. Улуус дьоно ону өйөөн ким туох кыахтааҕынан баһаарга сылдьар дьоҥҥо аһынан-таҥаһынан, уоту умуруорар тэриллэринэн, уматыгынан араас көрүҥнээх көмөлөрү оҥорууну көхтөөхтүк саҕалаатылар.
Бастакынан, Бүлүү куоратыгар «Биир ньыгыл Арассыыйа» улуустааҕы салаатын көҕүлээһининэн, уопсастыбаннай киини тэрийдилэр. Көмөнү бастакынан, урбаанньыттар Яков Ильинов, Хун Венцын уонна Анна Боятанова, Евдокия Николаева аҕаллылар. Урбаанньыт Ольга Алексеева-Сава Кыргыдай, Балаҕаччы, Бастакы Күүлэт, Үгүлээт нэһилиэктэригэр баһаарга туттарга диэн 200 лиитэрэ АИ-92 маркалаах бензиҥҥэ карточка арыйда, АЗС иһигэр аһымал харчыны хомуйар дьааһыгы туруорда. Ил Түмэн дьокутаата Александр Гоголев уматыгы атыылаһарга анаан 80000 солк. ыытта. Улуус тэрилтэлэрэ уонна биирдиилэн дьон, бэтэрээннэр харчы хомуйаннар, баһаар турбут нэһилиэктэригэр ыыттылар. Бу курдук Бүлүү дьоно айылҕа таһаарар алдьархайын утары ким туох кыахтааҕынан көмөлөһөллөр, ойуур баһаардарын умуруорууга күүс-тирэх буолаллар.
Бүлүүттэн Андрей Яковлев-Чуос, «Саха сирэ» edersaas.ru сайтка анаан.