Баһаары умулларыыга 38 мөл. солк. хомуллубут

Ааптар: 
Бөлөххө киир:

Быйыл Саха сиригэр улахан баһаардар туран, уопсастыбаннас хаһааҥҥытааҕар даҕаны күүскэ түмүстэ, биирдиилээн дьон, тэрилтэлэр үбүнэн-харчынан, малынан-салынан тиийэ көмөлөстүлэр. Баһаары умулларыыга көмөлөһөр соруктаах тэриллибит уопсастыбаннай ыстаап үлэһиттэрэ бэҕэһээ түмүктүүр пресс-кэмпириэнсийэни биэрдилэр, отчуоттаатылар.

edersaas.ru

Ойуур баһаардарын бохсууга уопсастыбаннай добровольческай ыстаап бэрэссэдээтэлэ Афанасий Алексеев иһитиннэриитин өрөспүүбүлүкэ нэһилиэнньэтигэр, урбаанньыттарга, судаарыстыбаннай тэрилтэлэргэ, хампаанньаларга махтал тыллартан саҕалаата. “Баһаар саамай күүһүрэн, куоракка буруоттан киһи тыына хаайтарар үлүгэрэ буолбутугар, ону тэҥэ, паромунан өрүһү туоратыыга буруо мэһэйдээн уустуктар үөскээбиттэригэр биһиги түмсэ түһэн хамсанарга быһаарыммыппыт. От ыйын 18 күнүгэр түмсэн балаһыанньаны быһаарсыбыппыт. Сарсыҥҥы күнүттэн ыстаап номнуо үлэтин саҕалаабыта.

Үлэбитин баһаары умулларарга аналлаах тэрили атыылаһарга үбү хомуйууттан уонна баҕа өттүнэн баһаарга барааччылары ыытыыттан саҕалаабыппыт. Киэҥ баһаар турбут улуустарыгар, сэлиэнньэлэригэр көмө оҥорбуппут. Ону таһынан, Бэс Күөлүгэр буолбут алдьархай кэнниттэн ыстаапка гуманитарнай көмөнү хомуйуу пууна тэриллибитэ”, — диэн кылгастык кэпсээтэ. Биллэн турар, сүрүн соругунан баҕа өттүлэринэн баһаарга барар эдэркээн дьону сэрэтэн, хааччыйан ыытыы, бастакы көмөнү оҥоруу этэ. Маныаха туһааннаах тэрилтэлэр өйөбүллэрэ, биирдиилээн дьон көмөлөрө улаханын ыйар.

Уопсастыбанньык, ыстаап хос бэрэссэдээтэлэ, толорор былаас уорганын кытта үлэҕэ эппиэттээх Константин Борисов иһитиннэрбитинэн, СӨ суһал ыстааба уонна баҕа өттүнэн кыттааччылар ыстааптара түмсэн кыттыгас мунньахтаабыттар. Эбээһинэстэрин чопчулаан баран киэҥ далааһыннаах үлэлэрэ саҕаламмыт.

Хас биирдии улууска анаммыт эппиэтинэстээх дьон биһиэхэ сибээскэ тахсаллара. Биһиги эмиэ чопчу ханнык улууска, баһаар буола турар сиригэр туох тэрили ыытары чопчулуурбут. Маҥнай утаа тэрил да, үп даҕаны ахсааннааҕа, миэстэтигэр тиэрдии даҕаны уустуктааҕа. Оннооҕор салгыы хайдах буолабыт диэн кытта боппуруостар күөрэйэ сылдьыбыттара. Онуоха былаас уорганнарын кытта үлэни кэҥэтэргэ быһаарыммыппыт. Ол бириэмэҕэ Людмила Валерьевна Николаева көмөтө, эбии үп укпута ыстааппытыгар иккис тыыны биэрбитэ”, — диэн бэлиэтиир.

Ону таһынан, туһааннаах министиэристибэлэри, тэрилтэлэри кытта ыкса ситимнээх үлэни ыыппыттар.

Ыстаап кыттыгас бэрэссэдээтэлэ Айыллаан Винокуров төһө үп киирбитин, төһө суума ханна-туохха ороскуоттаммытын пууннарынан кэппиэйкэтигэр тиийэ отчуоттаата. Ону хаартыскаттан көрүөххүтүн сөп.

Уопсайа, 38 964 385,43 солк. үп киирбит. Кини 139 тэрилтэ, 3040 киһи баһаары умулларыыга тус кылаатын киллэрдэ диэн иһитиннэрдэ.

Айыл Дьулурха Саха сирин олохтоохторун сэргэ, өрөспүүбүлүкэ тас өттүттэн бэйэлэрин баҕаларынан баһаары умулларыыга кэлбиттэрин кэпсээтэ. Бу курдук уустук үлэҕэ кэрэ аҥаардар кытта туора турбатахтарын этэр.

Константин Борисов түмүк тылы этэригэр ыстаап салгыы үлэлиэҕин иһитиннэрдэ итиэннэ кыстык иннинэ умайбыт бөһүөлэги волонтердар, норуот күүһүнэн чөлүгэр түһэриигэ быһаарыы ылыы хорсун быһыы, күүстээх санаа буоларын бэлиэтээтэ. Бу дьыалаҕа кыттыспыт, көмөлөспүт дьоҥҥо барыларыгар махталын биллэрдэ.

Людмила ПОПОВА, “Саха сирэ” хаһыат, edersaas.ru

Хаартыска: «Сахамедиа» медиа киинтэн.

+1
0
+1
0
+1
0
+1
0
+1
0
+1
0
+1
0