Бу дьыл ыам ыйын 19 күнүнээҕи туругунан, Саха Өрөспүүбүлүкэтигэр уот сиэбит 17 га уопсай иэннээх сиргэ 1 ойуур баһаарын умулларарга үлэ ыытыллар. Бу баhaaр Сунтаар оройуонун Ыгыатта сэлиэнньэтиттэн 10 килэмиэтир чэрчилээх зонаҕа тахсыбыта, билиҥҥи туругунан төгүрүтүлүннэ, нэhилиэнньэҕэ куттал суох.
edersaas.ru
Ааспыт сууккаҕа 7 оройуоҥҥа 283,5 га уопсай иэннээх сиргэ 14 ойуур баһаара суох оҥоһулунна (Аммаҕа – 1, Горнайга – 1, Ньурбаҕа – 6, Үөһээ Бүлүүгэ – 3, Уус-Алдаҥҥа — 1, Уус Маайаҕа – 1, Сунтаарга – 1).
Ойуур баһаарын умулларарга 241 киһи уонна 41 тиэхиньикэ үлэлээтэ.
Баһаар турар кутталлаах кэмэ саҕаланыаҕыттан барыта ойуурдаах сиргэ-уокка 689,0 га уопсай иэннээх 47 ойуур баһаара баар буола сылдьыбыта бэлиэтэннэ.
Салгын суудуналарын үлэлэрин былаана
Салгын 4 суудуната (3 сөмөлүөт өрөспүүбүлүкэ 3 оройуонугар уонна Дьокуускай куоракка – авиапатрулированиеҕа, 1 бөртөлүөт — ойуур баһаарыгар, дьону тиэрдиигэ, атын сиргэ көһөрүүгэ, оттук матырыйаалын, бородууктаны тиэрдиигэ) үлэлиэҕэ.
ИСДМ-Рослесхоз систиэмэтигэр хонтуруолга 46 475,0 га уопсай иэннээх 204 термоточка ылылынна.
Алта оройуон сиригэр-уотугар баһаары утары охсуһуу ураты эрэсиимэ киллэрилиннэ. Ол иһигэр, Өймөкөөҥҥө, Сунтаарга, Тааттаҕа, Томпоҕо уонна Үөһээ Бүлүүгэ.
Харыстанар сир-уот улахан өттүгэр орто КПО-1,5 үлэлиир.
«Саха сирэ», edersaas.ru анаан Наталья КОЛОДЕЗНИКОВА