Баһаартан, сааскы халаан уутуттан эмсэҕэлээбиттэргэ аналлаах көмө электроннай көрүҥүнэн оҥоһуллуоҕа
Араас хабааннаах быһылаантан, алдьархайтан, холобур, баһаартан, халаан уутуттан тугу да суох хаалыахха сөп. Ыксаллаах быһыыга-майгыга түбэспит дьон бас билэр баайдарын-дуолларын толуйуу анал хамыыһыйа тиийэн, көрөн-истэн быһаарбытытын эрэ кэнниттэн ыытыллар. Билигин ити тустаах үлэ электроннай көрүҥүнэн ыытыллар буолбута махталлаах дьыала. Ол эбэтэр, быдан судургутуйда.
Бу туһунан СӨ бырабыыталыстыбатын бэрэссэдээтэлин 1-кы солбуйааччы Дмитрий Садовников муус устар 12-14 күннэригэр буола турар ыксаллаах быһыы-майгы кэмигэр үлэлиир ыстааптарга аналлаах бүтүн Арассыыйатааҕы үөрэҕи тэрийии кэмигэр этэн турар.
«Тустаах тэрээһин сааскы халаан уута саҕаланыан иннинэ былаан быһыытынан ыытыллар. Баар кыһалҕалары быһаардыбыт. Боломуочуйалаах уорганнар судаарыстыбаннай өҥө порталын көмөтүнэн эмсэҕэлээбит нэһилиэнньэҕэ көмө харчыны ыытарга бэлэмнэнэллэр», — диэн Дмитрий Садовников иһитиннэрдэ.
Бас билэр баайдарын-дуолларын сүтэрбит дьоҥҥо судаарыстыбаннай көмөнү электроннай көрүҥүнэн биэриигэ бэлэмнэнии бастакытын ыытылынна. Ыксаллаах быһыыга-майгыга министиэристибэтэ билиһиннэрбитинэн, тустаах бэрэбиэркэлээһин бүгүн сарсыарда 8 чаастан 12 чааска диэри барар.
Александр Тарасов, «Саха сирэ».