Бэлиитикэ Сүрүн

Баһаартан кутталлаах кэмҥэ бэлэмнэнии дьаһаллара муус устарга түмүктэниэхтэрэ

Саха сирин үрдүкү былаастара 2022 сылга быһаартан кутталлаах кэмҥэ бэлэмнэнии чэрчитинэн сүрүн болҕомтону урутаан иһэр превентивнай миэрэлэри ылыныыга уураллар. Ол миэрэлэр Биир кэлим былаан бырайыагар киллэрилиннилэр.

edersaas.ru

Бу стратегическай докумуон бигэргэтиигэ төһө бэлэмин Саха сирин Ил Дархана Айсен Николаев тохсунньу 15 күнүгэр баһаар сезонугар бэлэмнэнии боппуруостарыгар анаммыт мунньахха билистэ.
«Дойду бэрэсидьиэнин быһаарыытынан 2022 сылга авиамониторины ыытарга, ойуур баһаарын умулларар дьаһалларга туттуллар үп улаатта», -– диэн Айсен Николаев бэлиэтээн эттэ.
Кини бэлиэтээн эппитинэн, бастакы уочараттаах соруктарга салгын суудуналарын туһаныы, «Авиалесоохрана» уонна «Якутлесресурс» тэрилтэлэр штаттарын ахсаанын улаатыннарыы уо.д.а. киирэллэр. Ил Дархан «Якутлесресурска» федеральнай үп чэрчитинэн атыылаһыллар ыарахан тиэхиньикэлэри: бульдозердары уонна соһор тиэхиньикэни туһанарга бастайааннай үлэһиттэринэн хааччыйарга ураты болҕомтотун уурда.
Баһаартан кутталлаах кэм саҕаланна да, өрөспүүбүлүкэ искусственнай сөҥүүнү түһэрэр тэриллээх авиациялаах буолуоҕа.
Билигин Биир кэлим былаан былаас бары ситэриилээх уорганнарын, федеральнай структуралары кытары сөбүлэһилиннэ уонна бырабыыталыстыба салалтатын кытта түмүктээх сөбүлэһии кэнниттэн өрөспүүбүлүкэ Ил Дарханыгар бигэргэтиигэ киллэриллиэҕэ.
2022 сылга баһаартан кутталлаах кэмҥэ бэлэмнэнии бары дьаһаллара муус устарга түмүктэниэхтээхтэр.

Надежда ЕГОРОВА, «Саха сирэ» ха7ыат, edersaas.ru

Андрей  СОРОКИН (СИА) хаартыскаҕа түһэриитэ

 

0
0
Telegram @edersaas20