Баһаартан эмсэҕэлээбит тэрилтэлэргэ Тыа хаһаайыстыбатын министиэристибэтэ көмө оҥоруоҕа
Өйөбүл туһунан СӨ Тыатын хаһаайыстыбатын миниистирин маҥнайгы солбуйааччы Татьяна Осипова кэпсээтэ:
— Кураан турдаҕына, былааннаммыт от кыайан оттоммотоҕуна, тэрилтэлэргэ 2019 сыл от ыйын 15 күнүнээҕи 190 нүөмэрдээх СӨ Бырабыыталыстыбатын ыйааҕар олоҕуран көмө оҥоһуллара. Быйыл атын ыксаллаах быһыы-майгы үөскээтэ. Өрөспүүбүлүкэ үрдүнэн уопсайа 2125 туонна от ойуур баһаардарыттан эмсэҕэлээтэ: Аммаҕа – 722 туонна, Таатта улууһугар – 550 туонна, Чурапчыга – 253 туонна, Уус Алдаҥҥа – 295 туонна о.д.а. улуустарга.
Онон улуустан тутулуга суох, тыа хаһаайыстыбатын бородууксуйатын оҥорон таһаарар кэпэрэтииптэргэ, ынаҕы, сылгыны иитэр бааһынай уонна кэтэх хаһаайыстыбаларга көмө оҥоһуллуоҕа.
Өйөбүл сууматын, сөбүлэҥин Үп министиэристибэтин кытары оҥоро сылдьабыт.
Ыксаллаах быһыы-майгы хамыыһыйатыттан бигэргэммит сайаапканы улуустар ыйыллыбыт дааннайдарга олоҕуран оҥоруохтаахтар: тыа хаһаайыстыбатын бородууксуйатын оҥорон таһаарар тэрилтэ аата, нэһилиэгэ уонна улууһа, төһө от умайбытын, хантан оту атыылаһалларын, барытын ыйан туран биэрэллэр.
СӨ Тыа хаһаайыстыбатын министиэристибэтэ ойуур баһаарыттан эмсэҕэлээбит тэрилтэлэри көмөтө суох хаалларбат сыаллаах-соруктаах.
Виктория Бястинова, «Саха сирэ» хаһыат, edersaas.ru
Хаартыска нвк-онлайн саайтан.