Балаҕан ыйын 20 күнүгэр баһаартан эмсэҕэлээбит Горнай уонна Томпо улуустарыттан сүрэх-тымыр, тыынар уорганнара ыалдьар 20 киһи санаторийга-куруорка сынньана, эмтэнэ көттүлэр. Кинилэр истэригэр Горнай улууһун Атамай нэһилиэгиттэн ойуур баһаарыгар эмсэҕэлээбит 9 киһи баар.
Кинилэр Владимирскай уобалас “Вольгинскай” реабилитациялыыр кииҥҥэ эмтэниэхтэрэ. Путевкалары Социальнай страховкалааһын пуондата биэрдэ. Көтүөхтэрин иннинэ кинилэр Үлэ, социальнай сайдыы министиэристибэтин, Социальнай страховкалааһын пуондатын үлэһиттэрин кытта көрсөн, сырыы араас боппуруостарын, ымпыгын-чымпыгын ырытыстылар.
Бу маннык бырайыагы Ил Дархан Айсен Николаев федеральнай таһымҥа туруорсан, олоххо киллэрбиттэрэ. Саха сириттэн номнуо төрдүс бөлөх эмтэнэн, доруобуйаларын чөлгө түһэрэн кэллэ. Ол чэрчитинэн, ойуур баһаардарыттан эмсэҕэлээбит улуустартан сүрэх-тымыр, тыынар уорганнара ыалдьар дьон эмтэнэ барар кыахтаахтар.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru