Айылҕа харыстабыла

Баһаарга үлэлиир байыастарга өймөкөөннөр махталлара муҥура суох

Бу күннэргэ Өймөкөөн улууһугар үс улахан баһаартан иккитин умуллардылар. Өрөбүллэргэ улуустааҕы муниципалитет салалтата СӨ «Якутлесресурс» ГАУ үлэһиттэрин Томпо улууһугар атаарда.
Бэс ыйын 22 күнүгэр Дьокуускайтан «Якутлесресурс» ГАУ 20 байыаһа көтөн кэлэн, нэдиэлэ устата Уус-Ньара аттынааҕы ойуур баһаарын умулларыыга үлэлээтилэр. Байыастар Дьокуускайтан, Хаҥалас уонна Нам улуустарыттан анал хамаанданан таҥыллан кэлэннэр уоту кытта охсустулар. Улуус дьаһалтатын аатыттан Махтал суруктары туттардыбыт, аара айаннарыгар өйүөлэригэр эбэн, фрукта уонна арбуз биэрэн ыыттыбыт. Уолаттар барахсаттар «хаһан да, ханна да маннык иһирэхтик биһигини көрсө уонна атаара иликтэр этэ», — диэн бэйэбитигэр махтаннылар. 30-тан тахса кыраадыс өҥүрүк куйаас сатыылаан турар кэмигэр айылҕа иэдээнин — ойуур баһаарын кытта үрдүк хайалаах кураанах сиргэ уоту кытта охсуһуох диэтэххэ, уустук дьыала. Ыччаттар салгыы Томпо улууһугар айаннаатылар. Ыаллыы улуус нэһилиэктэрэ билигин көмөҕө олус наадыйаллар. Сахабыт сирин ыччаттарыгар — «Якутлесресурс» ГАУ байыастарыгар, төрөөбүт дойдуларыгар ураты бэриниилэрин иһин Өймөкөөн улууһун олохтоохторун аатыттан барҕа махталбытын тиэрдэбит, — диэн улуус баһылыга Иннокентий Сивцев санаатын тиэртэ.

Елена ПОТОЦКАЯ, «Саха сирэ» хаһыат, edersaas.ru

0
0