Саха сирин Ил Дархана Айсен Николаев эрэгийэн Бырабыыталыстыбатын чилиэннэрин кытта суһал мунньаҕы ыытта. Онно Горнай улууһун Бэс Күөл сэлиэнньэтигэр баһаартан эмсэҕэлээбиттэргэ өйөбүл миэрэлэри оҥорууга сорудахтары биэртэлээтэ.
“Баһаары умулларар саамай күүстээх бөлөх чопчу Горнай улууһугар, Бэс Күөлгэ баар. Манна 300-чэкэ киһи, ол иһигэр Оборона министиэристибэтин инженернэй ротатын уонна тиэхиньикэтин чааһа баар. Ол эрээри, уот күүстээх буолан биэрдэ. 31 олорор дьиэни чөлүгэр түһэрэр кыаллыбат. Ол да буоллар, баһаары кытта охсуһааччылар уонна олохтоохтор көмөлөрүнэн атын тутуулары, ол иһигэр социальнай эбийиэктэри быыһаатылар”, — диэн өрөспүүбүлүкэ Ил Дархана эттэ.
Айсен Николаев кылгас кэм иһигэр дэриэбинэ инфраструктуратын чөлүгэр түһэрэргэ уонна ойуур баһаарыттан баайа-дуола эмсэҕэлээбит олохтоохторго социальнай көмөнү оҥорорго сорудахтаата.
СӨ Баайын-дуолун, Тыатын хаһаайыстыбатын, Бэтэринээрдэр департаменнарын исписэлиистэрэ нэдиэлэ устата тахсыбыт хорумньуну ааҕар үлэни бүтэриэхтэрэ. Тутуу министиэристибэтэ тутар хампаанньалары кытта Бэс Күөлүгэр тиэрдиллэр кыахтаах тутуу матырыйаалын уонна болдьоҕун суоттууллар. Дьиэлэри өрөспүүбүлүкэ бүддьүөтүн суотугар тутуохтара. Ил Дархан чөлүгэр түһэрии үлэтигэр тутар этэрээттэри сыһыарар кыаҕы көрөргө сорудахтаата.
Бүгүн сэлиэнньэҕэ, эрдэ куттал суоһаабатын диэн араарбыт туох баар уот уонна гаас ситимнэрин бэрэбиэркэлиэхтэрэ. Ирдэнэр буоллаҕына өрөмүөн үлэтин ыытыахтара. Бэрэбиэркэ кэнниттэн уоту уонна гааһы холбооһун боппуруоһун быһаарыахтара. Туһааннаах сорудаҕы өрөспүүбүлүкэни хааччыйар (ресурсоснабжающим) тэрилтэни кытта Олох-дьаһах хомунаалынай хаһаайыстыбатын министиэристибэтигэр биэрдэ.
Инфраструктураны хааччыйыыга суһал ыстаап салайааччытынан, Иркутскай уобаласка нэһилиэнньэлээх пууннар ууга барыыларын чөлүгэр түһэрэр үлэни сүрүннээбит улахан уопуттаах, СӨ бырабыыталыстыбатын бэрэссэдээтэлин бастакы солбуйааччы Дмитрий Бердников ананна.
СӨ Ил Дарханын уонна СӨ Бырабыыталыстыбатын пресс-сулууспата.
Хаартыска: Андрей СОРОКИН (СИА).