Мантан инньэ баһаары ыыппыт киһини аны уголовнай эппиэтинэскэ тарда буоллулар. Муус устар 5 күнүттэн киирбит сокуонунан миэрэлэр өссө кытааттылар. Бу туһунан «Парламентская газета» суруйар.
Киһи буруйуттан сылтаан 6-8 гектар кэриҥэ ойуур умайбыт буоллаҕына, суут уурааҕынан буруйдааҕы 300-500 тыһ. солк. тиийэ ыстарааптыахтарын, 480 чаас устата булгуччулаах үлэни толотторуохтарын, икки сылга диэри буруйун боруостуур үлэни сүктэриэхтэрин, 4 сылга диэри модьуйар (принудительные) үлэҕэ ыытыахтарын, биитэр букатын да ити болдьоххо көҥүлүн быһыахтарын сөп.
Баһаартан куттала суох буолуу быраабыларын кэспит буоллахтарына, 1-3 тыһ. солк. административнай ыстараапка тардыллыаха сөп. Өскөтө итинник быһыы-майгы эрэгийиэҥҥэ баһаары утары олохтоммут туспа эрэсиим кэмигэр таҕыстаҕына ыстараап 4-5 тыһ. тиийэ үрдүүр.
Бэрэдээги кэтиир уорганнар соруйан тайҕаны уоттаабыт эрэстииттэри туттахтарына, суут уураҕынан бу дьону 8 сылга диэри хараҥа хаайыыга угуохтарын уонна 1 мөл солк тиийэ ыстарааптыахтарын сөп.
Быраабыла быһыытынан ойуурга, кураанах оттоох-мастаах, торфалаах сирдэргэ, уот оттор, шашлыктыыр көҥүллэммэт. Мастартан тэйиччи, минеральнай балаһалаах сиргэ, анаан оҥоһуллубут балаһааккаҕа эрэ уот оттор көҥүллэнэр. Бөх-сах, бытыылка, өстүөкүлэ хаалларыллыбат, табах быраҕыллыбат. Субъектар бэйэлэрэ манна туспа быраабыла олохтуохтарын сөп.
«Саха сирэ» хаһыат
СИА хаартыската