ESG – диэн тугуй? Экологичнай, социальнай уонна корпоративнай салайыы. Аныгы ыччат айылҕа чөл туруктаах, олорор сирбит ыраас буоларыгар кыһаллар.
Мин бүгүн «Россия – Моя история» устуоруйа пааркатыгар сырыттым. Таһырдьа аан айаҕыттан үс көрүҥ улахан кууллар, киирии ааҥҥа батарейкалары тутар дьааһык, ону сэргэ пластигы, кумааҕыны, пластмасс хаппахтары угарга аналлаах үс дьэрэкээн дьааһык кэккэлэспит. Быһата, MuusuSTAR бэстибээл чэрчитинэн ESG диэн айыл5аны харыстыыр, киһи олорор сиригэр-уотугар үчүгэй усулуобуйаны тэрийэр соруктаах трекка сырыттым. Бэҕэһээ сырдатан аһарбыппыт курдук, аар айылҕабытын харыстыыр сыаллаах EcoSTART өрөспүүбүлүкэтээҕи бырайыак куонкуруһугар мэдиссиинэ кэллиэһин устудьуоннара кыайыылааҕынан тахсыбыттара. Санатар буоллахха, устудьуоннар икки ардыларыгар экологияны харыстыыр соруктаах саҥа бырайыактары көмүскүүр куонкурус ыытыллыбыта. Куонкурус MuusuSTAR ыччат бэстибээлин уонна XVI «Айыл5а уонна биһиги” диэн экологическай аахсыйа чэрчитинэн ыытылынна.
Манна кыттарга устудьуоннар экологическай бырайыактарын, саҥа идиэйэлэрин, бөҕү наардаан хомуйар, экология туругун тупсарар соруктаах саҥа этиилэрин, көрүүлэрин билиһиннэрэллэр. Куонкуруска уопсайа 46 ааптартан 24 бырайыак киирбитэ. Ол курдук орто, үрдүк үөрэх кыһаларын устудьуоннара көхтөөхтүк кыттыбыттара.
1 миэстэни – «Отряд ЭКО. МЕДИКОЛЛ» диэн Кристина Степанова, Елена Бережнова, Валентина Васильева мэдиссиинэ кэллиэһин устудьуоннарын бырайыага ылбыта.
Бырайыак кыайыылаахтарын Лена Бережнева, Кристина Степанованы кытта кэпсэттим :
— Биһиги бастакы куурус устудьуоннара буолабыт. Мин сиэстэрэ дьыалата диэн салааҕа үөрэнэбин, Лена акушер дьыалата диэҥҥэ, Валябыт сотору кэлиэхтээх, кини эмиэ эмтиир дьыала (лечебное дело) салааҕа үөрэнэр. Бырайыакпыт бөҕү арааран хомуйар соруктаах буолар. Биһиги кэллиэспит иһинэн бу үлэни салайааччыбыт Екатерина Егоровна Томская көҕүлээн, бастаан бу хамсааһыны оҥорбута. Кини кэллиэспитигэр “ЭКО волонтердар” диэн хамсааһыны сүрүннүүр. Кэллиэспитигэр номнуо туһаттан тахсыбыт батарейкалары, пластмасс хаппахтары, макулатураны туспа тутар үс анал дьааһыктаахпыт. Онтубут аата экстрерьернэй контейнер дэнэр. Биһиги устудьуоннар истэригэр волонтердар туспа хамсааһыннаахпыт. “Экология” куруһуогар сылдьан бары түмсэн, санаа атастаһан маннык бөҕү арааран хомуйууну бастаан бэйэбит кэллиэспититтэн саҕалыырга быһаарыммыппыт. Кыайыылаах буолбуппутуттан наһаа үөрдүбүт. Сарсын «Триумф” успуорт уораҕайыгар кыайыылаахтары эҕэрдэлииллэр. Бүгүн бу бырайыакпытын көмүскээтибит. Уопсайынан, кэлин волонтер хамсааһынын өйүүр ыччат элбэҕин бэлиэтии көрөбүт. Атын да үөрэх кыһаларыгар биһиги курдук толкуйдаах, куораты, дойдуну ыраастык тутарга кыһанар устудьуон элбэҕэ үөрдэр.
Мэдиссиинэ кэллиэһин устудьуоннарын кыайыылаах бырайыактарын туһунан сиһилии Саха сирэ хаһыат кэлэр нүөмэригэр сиһилии ааҕаарыҥ.
Бэлиэтээн эттэххэ, бэстибээл СӨ Бырабыыталыстыбатын уонна Росмолодежь тэрийиитинэн ыытыллар. Генеральнай партнердарынан “Эльгауголь” уонна “Якутия” авиахампаанньа, «Транснефть” тэрилтэлэр буолаллар. Оттон информационнай партнердарынан — МУЗ-ТВ, Rutube, ВКонтакте ааттыыбыт.
Ульяна ЗАХАРОВА.
Ааптар хаартыскаҕа түһэриитэ.