Бэҕэһээ нэһилиэкпит ыһыаҕа онлайн эрэсииминэн ыытылынна.
Ыһыах түһүлгэтигэр улуус бочуоттаах олохтооҕо, норуот хаһаайыстыбатын үтүөлээх үлэһитэ Алексей Николаевич Игнатьев 7 кыталык кыыс, 7 туруйа уол арыалдьыттаах киирэн алгыс сиэрин-туомун толордо. Үтүөкэн сайыны алҕаабыт алгыһа тута тиийэн, этиҥнээх илгэлээх ардах түстэ. Баһылыкпыт Александр Егорович Слепцов Үрүҥ Тунах ыһыаҕынан эҕэрдэтэ, ырыа-тойук дуорайдылар.
90 сааһын туолбут ытык киһибитигэр Мария Михайловна Тарабукинаҕа улуус култууратын сайдыытыгар кылаатын иһин, биллиилээх механизатор Иван Степанович Чичаховка СӨ Тыатын хаһаайыстыбатын бэтэрээнэ бэлиэлэр, урбаанньыт Иван Николаевич Забровскайга Ил Тумэн бэрэссэдээтэлин махтал суруга үөрүүлээх быһыыга-майгыга дьиэлэригэр туттарылыннылар.
Тыыл бэтэрээннэригэр, сэрии сылын оҕолоругар босхо үтэһээлээх эти, кымыһы тиксэрэн үөртүлэр. Нэһилиэк олохтоохторугар ыһыах күн босхо кымыһы түҥэтэр үтүө үгэс бу да сырыыга тутуһулунна. Дьон-сэргэ олохтоох дьаһалтаҕа, сынньалаҥ киинигэр, арыы собуотун үлэһиттэригэр, спонсордаабыт Егор Николаевич Сидоровка, Петр Михайлович Назаровка махтанар.
Салгыы интэриниэт ситимин нөҥүө араас күрэстэри, күрэхтэһиилэри ыыттылар. Ол курдук, дьиэ кэргэнинэн сахалыы сиэдэрэй таҥаһы көрүү буолла. Дьүүллүүр сүбэ быһаарыытынан Борисовтар дьиэ кэргэн бастакы, Семеновтар — иккис, үһүс Чурапчы Сылаҥыгар олорор Нарыйа Говорова дьиэ кэргэнэ буоллулар.
Сахалыы астаах сандалыга Семеновтар, Аринкиннар кыаҋаннар, тэрээһиҥҥэ көхтөөхтүк кыттар, байылыат ыал буолалларын дакаастаатылар.
Сахалыы ырыаны толоруу күрэһэр Светлана Новгородова кыайыылаах буолла, Алиса Слепцова иккис, Ньургуйаана Прокопьева уһус үрдэлгэ таҕыстылар.
Үгэс буолбут успуорт күрэхтэһиилэригэр ох саанан ытыыга, ыараханы көтөҕүүгэ күрэхтэстилэр. Бэргэн ытааччыларынан Юлия Слепцова, Уйгулаан Андросов буоллулар, ыараханы көтөҕүүгэ эдэр спортсмен Лаврик Федоров кыайда. Маннык күрэхтэһиилэр оҕолору эмиэ хаптылар.
Ыһыах күн оскуоланы 50 сыллааҕыта бүтэрбит 1971 сыллааҕы выпускниктар мустан эргэ оскуолаҕа, искибиэрдэргэ, таҥара дьиэтигэр, музейга сырыттылар. Музейга кинигэ, искибиэргэ ыскамыайка ыларга харчы бэлэх ууннулар. Ыһыах бырааһынньыга матаһыыкыл, миэбэл, таҥас сууйтарар массыына, бэлисипиэт курдук улахан сүүйүүлээх лотереянан түмүктэннэ. Сүүйүүлээх оонньууну эстрада артыыһа Анатолий Горохов ыытан киэргэттэ. Сүүйүүлээх оонньуу элбэх киһини хапта, сүрүн бириис Наахараҕа барда.
Ыһыахтаабыт дойдубут дьоно ардахтан үөрэн, сайыҥҥы түбүккэ туруннулар.
Константин Родионов,
Мэҥэ Хаҥалас.