СӨ Бырабыыталыстыбатын бэрэссэдээтэлин солбуйааччы Ольга Балабкина муус устар 2 күнүгэр Суһал ыстаап брифинин күнүс ыытта.
Бу күҥҥэ биллэр чахчыларынан, бүтэһик сууккаҕа өрөспүүбүлүкэ үрдүнэн 25 киһи коронавируска сутуллубут. Мантан 15 киһи Дьокуускай куорат олохтооҕо. Чурапчыга уонна Нерюнгригэ иккилии киһи, Аммаҕа, Ньурбаҕа, Өлүөхүмэҕэ, Тааттаҕа, Уус Алдаҥҥа уонна Мииринэйгэ биирдии киһи ыалдьыбыт.
Өлүөхүмэҕэ уонна Уус Алдаҥҥа COVID-19 ыарыынан ыалдьыбыт дьон көстүбүтүнэн сибээстээн, Суһал ыстаап бу улуустар дьаһалталарыгар болҕомтолорун күүһүрдээлэригэр ыйбыт. Бу туһунан Ольга Валерьевна кэпсээтэ.
Биир суукка иһигэр 1814 коронавируска тест оҥоһулубут. Пандемия саҕаланыаҕыттан 1 012 448 тест оҥоһуллан, чинчийиини ааста.
Вакцина маҥнайгы түһүмэҕин 59097 өрөспүүбүлүкэ олохтооҕо ылбыт. Иккис түһүмэх быһыыны 52386 киһи ааспыт. Маҥнайгы уочарат вакциналааһыны билигин 60 саастарын ааспыт дьон ылар. Бүгүҥҥү күҥҥэ Саха сирин бу категорияҕа киирсэр гражданнарыттан 12811 киһи маҥнайгы түһүмэх вакцинатын ылбыт. Бүгүн 30600 саҥа вакцина өрөспүүбүлүкэҕэ кэлбит.
Ольга Валерьевна 60 саастарын ааспыт дьон бэйэни хааччахтаныы эрэсиимигэр олоруулара муус устар 1 күнүгэр Ил Дархан ыйааҕынан уһатыллыбытын санатта. “Ол эрээри, вакциналаммыт эбэтэр номнуо ыалдьан үтүөрбүт дьон бу эрэсиимтэн тахсаллара көҥүллэнэр”, — диэн СӨ Бырабыыталыстыбатын бэрэссэдээтэлин солбуйааччы тоһоҕолоон эттэ.
«Саха сирэ» хаһыат, edersaas.ru
Хаартыска — www.sakha.gov.ru