Бүгүн, тохсунньу 21 күнүгэр, бырабыыталыстыба бэрэссэдээтэлин солбуйааччы Ольга Балабкина быһа эфиргэ тахсан өрөспүүбүлүкэҕэ коронавирус дьаҥын балаһыанньатын билиһиннэрдэ.
Бүтэһик сууккаҕа өрөспүүбүүкэ үрдүнэн 146 киһи сутулунна. Дьокуускайга — 45 киһи. Мииринэйгэ, Алдаҥҥа, Мэҥэ Хаҥаласка ыалдьыы элбэх түгэнэ көһүннэ. Улуустарга ыарыы тарҕаныытыгар улуус уонна нэһилиэк баһылыктара сүрүн эппиэтинэһи сүгэллэрин чопчулаата. Кини Эбээн Бытантай улууһугар буолбут түгэни бэлиэтээн ааста. Ол курдук куораттан тиийбит устудьуоннар хааччахтааһыны тутуспаккалар, нэһилиэк баһылыга хонтуруолга ылбакка, дьон ыарыыга сутуллубутун эттэ.
Бүтэһик сууккаҕа лабораторияларга 2051 анаалыс оҥоһуллубут.
Вакциналааһын боппуруоһугар тохтоото. 13 улууска номнуо вакцина тиийэн дьон ылан эрэллэр. Өрөспүүбүлүкэҕэ уопсайа 27292 вакцина кэлбит. Доруобуаны көрүнүүгэ вакцина наадалааҕын умнумаҥ диэн түмүктээтэ.
Ульяна Захарова, edersaas.ru