Бүтэһик хонукка 58 киһи коронавирустаабыт, 108 киһи үтүөрбүт

Саха сирин Бырабыыталыстыбатын бэрэссэдээтэлин солбуйааччы Ольга Балабкина бүгүн, от ыйын 16 күнүгэр, өрөспүүбүлүкэҕэ коронавирус балаһыанньатын туһунан иһитиннэрдэ.

—Бүтэһик хонукка 58 киһи коронавирус дьаҥар сутуллубут. Итинтэн 41 киһи Дьокуускайга олорор. Сэттэ киһи Мэҥэ Хаҥаласка ыалдьыбыт.  Коронавируһу бохсор улуустааҕы суһал ыстаап элбэх кэлиилээх-барыылаах оройуоҥҥа ирдэбили кытаатыннарара ирдэнэр, — диэтэ.

Түөрт киһи Алдаҥҥа ыалдьыбыт. Мантан сиэттэрэн, ньиэрбэ ыарыһахтар сытар Томмоттооҕу диспансердарыгар хонтуруол кытааппытын, санитарнай үлэлэр күүһүрдүллүбүттэрин эттэ. Чурапчыга ирдэбиллэр күүскэ тутуһуллубуттарын үрдүнэн, хомойуох иһин, икки киһи дьаҥнаабыта бэлиэтэннэ диэтэ. Оттон биирдиилээн ыалдьыы Булуҥҥа, Ленскэйгэ, Хаҥаласка, Нерюнгрига бэлиэтэммит. Бүтэһик хонукка 108 киһи үтүөрбүт.

Маны сэргэ, сыстыганнаах дьаҥҥа хаптарбыттары эмтээһин туһунан быһаарда. Дьаҥҥа хаптарыы түбэлтэтэ бэлиэтэннэҕинэ, ыалдьыбыт киһини кытары быраас сибээһэ булгуччу тутуһулларын, бары көмө уталытыллыбакка оҥоһулларын эттэ. Улаханнык ыалдьыбыттар өрөспүүбүлүкэтээҕи  сыстыганнаах ыарыһахтары эмтиир балыыһаҕа сыталларын, Москваттан телемэдиссиинэ көмөтүнэн сүбэ-ама оҥоһулларын бэлиэтээтэ.

Коронавирус дьаҥын утары охсуһар өрөспүүбүлүкэтээҕи суһал ыстаап, Доруобуйа харыстабылын министиэристибэтэ уонна Роспотребнадзор анаалыстары ылар 11 лабораторияҕа үлэлэлэрин тэтимин өссө түргэтэтэллэригэр сорук туруорбуттар.