Саха сиригэр уотунан иитиллэн айанныыр бөҕө-таҕа бэлисипиэти оҥорон саҕалыахтара.
Алтынньыга «Якутия» технопаарка резиденэ — Дьокуускайдааҕы хочуоллары (оһохтору) оҥорон таһаарар собуот (котловой завод) бэйэ ырыынагар уотунан иитиллэр бөҕө-таҕа бэлисипиэттэри оҥорор былааннаах. Бу көлө, этиллэринэн, тас дойдулар бэлисипиэттэриттэн сыаната чэпчэки буолуохтаах. Иһитиннэриигэ 50 тыһыынчаттан саҕаланыа диэн ыйыллар.
Уотунан иитиллэн айанныыр бэлисипиэт тулалыыр эйгэҕэ буортута суох уонна чааһа да аҕыйах диэн суруллар. Туттарга табыгастаах уонна судургутук иитиллэр. Көлө оҕоҕо уонна улахан киһиэхэ олорор миэстэлэрдээх, курьерга аналлаах уонна мал-сал уурар анал сирдэрдээх. Толору ииттэрдэххэ, көнө суолунан чааска ортотунан 40 км айанныахха сөп.
Собуот сүрүн инженерэ Виталий Прокопьев этэринэн, бэлисипиэт Саха сирин усулуобуйатыгар сөп түбэһэр. Тыа сирин суолугар-ииһигэр сылдьарга учуоттаммыт. Бэл, -15 кыраадыс тымныыга, суола-ииһэ мөлтөх сиргэ сылдьыахха сөп, көлүөһэтэ онно сөп түбэһэр диэбиттэр.
Хампаанньа бу оҥоһугун Владивостокка Илиҥҥи экэнэмиичэскэй пуорумҥа көрдөрбүт. Бэлисипиэккэ болҕомто хатаммыт, ол иһигэр «Яндекс» бэрэстэбиитэллэрэ сэҥээрбиттэр.
—Билигин кэпсэтии бара турар. «Яндекс» үлэҕэ туһанарга баартыйанан үлэх оҥоруон баҕарар. Көлөнү Саха сиригэр эрэ буолбакка, атын эрэгийиэннэргэ эмиэ атыылыахпыт. Кыһалҕа үөскүө суоҕа, тоҕо диэтэххэ, биһиги хочуолларбытын (оһохторбутун) дойдуга барытыгар туһаналлар, — диэн этэр собуот сүрүн инженерэ.
Собуот 2013 сылтан үлэлиир, 2016 сылтан «Якутия» технопаарка резиденэ.