Ил Дархан Айсен Николаев социальнай ситимнэринэн быһа сибээскэ тахсар кэмигэр кирэдьиит, ипотека туһунан үгүс ыйытыы киирдэ. Биллэн турар, муус устар 30 күнүгэр диэри өрөбүл күннэр уһаан биэрбиттэринэн сибээстээн, бу ордук чааһынай эйгэлэргэ үлэлиир дьоҥҥо охсуулаах диэн бэлиэтээтэ.
«Бары үлэ биэрээччилэргэ хамнстарын төлүүргэ сорудахтаныллыбыта эрээри, сорохтор үлэһиттэрин “простойга”, атыттар болдьоҕо суох уоппускаҕа ыыта сатыыллар, үгүс тэрилтэлэр сабылынныбыт дииллэр. Саамай охсууну “нелегальнай секторга” үлэлээбиттэр ылаллар. Туох даҕаны юридическай көмүскэллэрэ суох. Судаарыстыба кинилэргэ көмөлөһүөҕэ. Бэрэсидьиэн бааҥҥа кирэдьиит төлүүргэ отсрочка, аччыгый тэрилтэлэргэ хамнаска иэһи төлүүллэригэр кыра бырыһыаннаах кирэдьиит көрүллэригэр миэрэлэри ылбыта», — диэн эттэ. Аччыгый биисинэс эрэ буолбакка, бөдөҥ тэрилтэлэр эмиэ охсууну ылалларын ыйда.
«Маныаха, бастатан туран, нация доруобуйата тутулуктаах. Иккис курдук — экэнэмиичэскэй турук. Биллэн турар, ыарыыттан куттанымыахха диэхпитин сөп этэ. Оччотугар икки нэдиэлэ иһинэн улахан уустуктары көрсүөхпүтүн сөп. Кэмигэр дьаһал ылбатах тас дойдулары көрө-билэ сылдьабыт», — диэн холобурдаата.
edersaas.ru