Дьокуускай куоракка ыытыллыбыт 58-с үлэ сезонун сабыллыытыгар аналлаах Бүтүн Арассыыйатааҕы слет түмүктэннэ. Эһиилги слет Ростов-на-Дону куоракка ыытыллыаҕа.
Слекка Арассыыйа эрэ буолбакка, Казахстантан уонна Белоруссия устудьуоннарын этэрээттэрин байыастара, комиссардара уонна хамандыырдара бочуоттаах ыалдьыт быһыытынан сырыттылар. Кинилэр слет тэрээһинин, Дьокуускайга көрсүбүттэрин олус үрдүктүк сыаналаабыттарын биллэрдилэр. Белоруссия устудьуоннарын тутар этэрээттэрин штабын хамандыыра Надежда Шаховская, тэрийэр хамыһыйаҕа, Дьокуускай олохтоохторугар махтал тылларын этэн баран, Саха Өрөспүүбүлүкэтин устудьуоннар тутар этэрээттэрин бырабылыанньатын бэрэссэдээтэлигэр Гаврил Семеновка хурустаал мастерок туттарда. Оттон Казахстан устудьуоннарын тутар этэрээттэрин штабын салайааччыта Арассыыйа уонна Казахстан тутар этэрээттэрин кытта дуогабар түһэрсибитин сырдатта. Кэлэр сылтан казахстан байыастара арассыыйаҕа уонна белоруссияҕа ыытыллар устудьуоннар тутууларыгар үлэлиэхтэрэ.
СК «Росатом» хампаанньа тутууларын салайааччыта Андрей Голованов ааспыт сылга үрдүк көрдөрүүлээх байыастарга бочуоттаах бэлиэ туттартаата. Быйылгы сылга ордук үлэлээҕинэн Алтайскай кыраай штаба ааттанна.
IV-с Арассыыйа тутар этэрээттэрин истэригэр ыытыллыбыт спартакиада кыайыылааҕынан Приволжскай федеральнай уокурук ааттанна. Кубогы Саха Өрөспүүбүлүкэтин бырабыытылыстыбатын бэрэссэдээтэлин солбуйааччы Михаил Гуляев туттарда.
Түмүгэр, Арассыыйатааҕы устудьуоннар этэрээттэрин знамятын Саха Өрөспүүбүлүкэтин устудьуоннарын тутар этэрээттэрин бырабылыанньатын бэрэссэдээтэлэ Гаврил Семенов Ростов-на-Дону устудьуоннарын тутар этэрээттэрин бырабылыанньатын бэрэссэдээтэлигэр Дмитрий Кротовка туттарда.
Евгений Чекин, Саха Өрөспүүбүлүкэтин бырабыытылыстыбатын бэрэссэдээтэлэ:
— Тутар этэрээттэр дойдубут сайдыытыгар бастакы хардыыны оҥорбуккут. Тоҕо диэтэр БАМ, Сочи куорат олимпийскай куоратын, «Восточный» космодрому, Чайыҥдатааҕы нефть үөскүүр сирин тутуутугар сүрүн оруоллаах этигит. Сыл аайы устудьуоннар тутар этэрээттэрин байыастарын ахсаана элбээн иһэр. Эһиги үлэҕит-дойдубут сайдыытын тутула!
Николай Попов, «Саха сирэ» хаһыат, edersaas.ru