Бүтүн Арассыыйатааҕы успуорт бэстибээлигэр ХИФУ устудьуоннара ситиһиилэннилэр

Бөлөххө киир:

Балаҕан ыйын 18-20 күннэригэр ыытыллыбыт бүтүн Арассыыйатааҕы устудьуоннар успуортарын бэстибээлигэр ХИФУ хамаандата стрит-бол көрүҥҥэ иккис миэстэ буолла.

Бэстибээлгэ Арассыыйа араас үөрэҕин кыһаларыттан уопсайа тыһыынчаттан тахса оҕо кытынна. Манна 14 успуорт көрүҥэр күрэхтэстилэр. ХИФУ-ттан брейк-данс уонна стрит-бол диэн уулуссаҕа оонньонор баскетбол көрүҥэр кытыннылар. Стрит-болга 27 хамаандаттан ХИФУ устудьуоннара иккис миэстэни ылары ситистилэр.

Хамаанданы иилээн-саҕалаан илдьэ барбыт ХИФУ физкультураҕа уонна успуорка институтун успуорт туризмын уонна маассабай успуорт көрүҥнэрин хаапыдыратын сэбиэдэссэйэ Ариан Тарасов санаатын үллэһиннэ:

— Балаҕан ыйын 18-20 күннэригэр Екатеринбург куоракка бүтүн Арассыыйатааҕы успуорт бэстибээлигэр икки көрүҥҥэ кытыннараары хамаандалары тэрийэн кэлбиппит. Стритбол көрүҥэр биһиги хамаандабыт Ураллааҕы Федеральнай университет хамаандатыгар биир очукуонан кыайтаран иккискэ таҕыстыбыт. Бэлиэтээн эттэххэ, стрит-баскетбол көрүҥэ Олимпиадаҕа киирбитэ, онон инникилээх успуорт көрүҥэ буолар. Оҕолорбут бэркэ кыттыбыттарын бары наһаа соһуйа уонна сөҕө көрдүлэр, тоҕо диэтэххэ, бачча  ыраах сиртэн күрэхтэһэ кэлэн баран биир эрэ очукуонан хотторбуппутун сөхтүлэр. 2022 с Уус Алдан улууһугар VIII Саха сирин норуотун оонньуулара ыытыллыахтаах. Стрит-баскетбол манна киирэр.

Ульяна Захарова.

Хаартыскалар Ариан Тарасов тус архыыбыттан туһанылыннылар.

+1
0
+1
0
+1
0
+1
0
+1
0
+1
0
+1
0