Бүтүн Арассыыйатааҕы муус оҥоһук куонкуруһугар сахалар анал бирииһи ылбыттар

Пермь куоракка VI «Зимний вернисаж» диэн муус оҥоһуктарга Арассыыйа Кубога буолан ааста.  Манна кыайыылааҕынан Рязань хамаандата таҕыста, оттон куорат баһылыгын анал бирииһин (мууһунан оҥорорго аналлаах инструменнар) Саха сириттэн ини-бии Петр уонна Роман Петуховтар ылбыттар. Кинилэр «Араҥаччылааччы» диэн муус оҥоһугу дьэндэтэн таһаарбыттар. Маастардар Намтан төрүттээхтэр эбит, Майаҕа олороллор. Сыл аайы маннык хабааннаах куонкурустарга кытталлар, элбэх ситиһиилээхтэр эбит.

Куонкурус нэдиэлэ устата буолбут, Сингапуртан, Малайзияттан, Кытайтан уонна Арассыыйаттан 22 маастар күөн көрсүбүт. Японияҕа сыһыаннаах муус оҥоһуктары оҥорон таһаарбыттар. Дьүүллүүр сүбэҕэ дойду култуураҕа министиэристибэтин бэрэстэбиитэллэрэ, худуоһунньуктар киирбиттэр.

Саха сириттэн «Вернисажка» өссө биир хамаанда кыттыбыт. Василий Аргунов уола Анатолий Аргуновы кытта «Кусочек счастья» диэн муус оҥоһугу оҥорбуттар.