Бүтүн Арассыыйатааҕы литература бириэмийэтин туһунан медиаоскуола истээччилэригэр кэпсээтилэр
Муус устар 11 күнүгэр “Уһук Илиҥҥи репортер” медиаоскуола төрдүс күнүскү сессиятын чэрчитинэн В.К.Арсеньев аатынан “Уһук Илин” Бүтүн Арассыыйатааҕы литература бириэмийэтин сүрэхтэниитэ буолан ааста.
Литература куонкуруһун туһунан Уһук Илиҥҥэ литература сайдыытыгар анаммыт “төгүрүк остуол” кэмигэр билиһиннэрдилэр. Манна биллиилээх суруйааччылар Уһук Илин эрэгийиэнин литературатын аналын уонна соруктарын, наҕараадалыыр фондатын уонна уратыларын туһунан кэпсээтилэр.
“Төгүрүк остуолга” Саха норуодунай бэйиэтэ, Саха сирин Суруйааччыларын сойууһун бэрэссэдээтэлэ, Духуобунас академиятын академига Наталья Харлампьева, үрдүк категориялаах быраас Валентин Егоров, М.К.Аммосов аатынан Уһук-Илиҥҥи федеральнай университет Филология бакылтыатын суруналыыстыка хаапыдыратын сэбиэдиссэйэ, СӨ Суруйааччыларын ассоциациятын бэрэссэдээтэлэ, Духуобунас академиятын академига, суруйааччы, публицист Олег Сидоров, бэйиэт, прозаик, киинэ сценарийын суруйааччы, Арассыыйа Суруйааччыларын сойууһун чилиэнэ, Арассыыйа Суруналыыстарын уонна Саха сирин киинэ устааччыларын сойууһун чилиэнэ Айсен Сивцев-Айсен Дойду уонна Приморье суруйааччыта Василий Авченко кытыннылар.
“Уһук Илин” – тайаан сытар сиринэн уонна устуоруйатынан даҕаны ураты эрэгийиэн. Бу дойду баай, кэрэ айылҕатынан чугас олорор, бу сиргэ олохсуйар уонна үөрэтэр дьону сөхтөрөр. Ол иһин Москваҕа ыытыллыбыт Уһук Илин күннэрин кэмигэр Арассыыйа Бырабыыталыстыбатын бэрэссэдээтэлин солбуйааччы – Арассыыйа Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев өйөөбүт Бүтүн Арассыыйатааҕы литература күрэстэһиитин ыытар туһунан биллэрбиттэрэ”, — диэтэ Василий Авченко.
Бириэмийэ быйыл аан бастаан үс номинациянан ыытыллар: “Уһун тыыннаах проза”, “Кылгас проза”, “Оҕолорго аналлаах проза”.
В.К.Арсеньев аатынан бириэмийэни Уһук Илин тиэмэтигэр анаммыт олохтоох ааптардар айымньыларыгар туттарыахтара. Бириэмийэҕэ арамааннар, сэһэннэр, сэһэннэр эбэтэр кэпсээннэр хомуурунньуктара, ону тэҥэ докумуоҥҥа олоҕуран суруллубут сэһэннэр уонна ахтыылар тиксиэхтэрин сөп. Ааптар ханна олороро тутулуга суох, нуучча тылынан суруллубут буолуохтаах.
“Бириэмийэ сүрүн соругунан кыайыылаахтары наҕараадалааһыны уонна аныгы ааптардар тустарынан кэпсээһини сэргэ 21 үйэҕэ сайдыы тумус тутуллар сирин-уотун быһыытынан Уһук Илин култууратыгар дьон интэриэһин тардыы “, — диэн Авченко сиһилии быһаарда.
Саха сирин Суруйааччыларын сойууһун бэрэссэдээтэлэ Наталья Харлампьева бу бириэмийэ дьоһун суолтатын бэлиэтээтэ уонна тэрийээччилэртэн инникитин төрөөбүт тылларынан суруйааччыларга туспа номинацияны аныылларыгар туруоруста.
Бириэмийэ лауреаттарын ааттаах-суоллаах жюри сүүмэрдиэҕэ.
Литература куонкуруһугар кыттыан баҕалаахтар 2019 сыл бэс ыйын 30 күнүгэр диэри премияарсеньева.рф саайтыгар сайаапкаҕытын ыытыҥ.
Кыайыылаахтары 2019 сыл ахсынньы ыйга ааттыахтара.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата