Бэлиитикэ Нацбырайыактар Уопсастыба

Бүтүн Арассыыйатааҕы куонкуруска Саха сирэ алта сайаапканы ыытыаҕа

Саха Өрөспүүбүлүкэтэ быйыл аччыгый куораттарга уонна историческай поселениеларга куорат табыгастаах эйгэтин тэрийэр бастыҥ бырайыак Бүтүн Арассыыйатааҕы куонкуруһугар кыттарга алта сайаапканы бэлэмнээбит. Бу туһунан Саха сирин эрэгийиэнин салайар киинигэр өрөспүүбүлүкэ кылаабынай архитектора Ирина Алексеева иһитиннэрдэ.

Куонкурус 2018 сылтан дойду бэрэсидьиэнэ Владимир Путин сорудаҕынан ыытыллар итиэннэ “Олох уонна куорат эйгэтэ” национальнай бырайыак “Куорат табыгастаах эйгэтин олохтооһун” федеральнай бырайыагар киирэ сылдьар. Федеральнай хамыыһыйа сайаапканы бэс ыйын 1 күнүгэр диэри ылар.

Ирина Алексеева этэринэн, эрэгийиэннээҕи хамыыһыйа сыаналаабытын кэннэ, сайаапкалары РФ Тутууга министиэристибэтин көрүүтүгэр ыытыахтара.

Саха сирэ тустаах куонкуруска номнуо төрдүс сылын, хара маҥнай ыытыллыаҕыттан кыттар. Бу сыллар тухары куонкурус кыайыылаахтарынан Өлүөхүмэ, Орто Халыма, Верхоянскай, Покровскай уонна Ньурба куораттар буолбуттара.

Быйыл алта сайаапканы бэлэмнээтибит. Онон «LETO» компетенциялар кииннэрин хамаандата, куонкуруска сайаапка ыыппыт алта куорат – Мирнэй, Ленскэй, Ньурба, Өлүөхүмэ, Алдан уонна Покровскай дьаһалталарын кытта дьарыктанар”, — диэн СӨ Ил Дархаҥҥа Архитектураҕа уонна куораты тутууга управлениетын салайааччыта – өрөспүүбүлүкэ кылаабынай архитектора Ирина Алексеева кэпсээтэ.

Тэрийэээччилэр бэлиэтииллэринэн, куонкуруска 100 тыһыынчаҕа диэри ахсааннаах нэһилиэнньэлээх  куораттар, ону тэҥэ, федеральнай уонна эрэгийиэн суолталаах историческай поселениелар кытталлар. Сыллата дойду хааһынатыттан 10 миллиард солкуобай үбү көрөн, 160 кыайыылаах куоракка тыыраллар. Хас биирдии кыайыылаах куорат бэйэтин этиитин олоххо киллэрэригэр грант ылар.

 

СӨ сүрүн информационнай порталыттан.

0
0