Бүтүн Арассыыйатааҕы бэрэбиэркэлиир үлэ ыытыллар болдьоҕун ыйдылар
Бүтүн Арассыыйатааҕы бэрэбиэркэлиир үлэ (ВПР) үрдүкү кылаас оҕолоругар дьаҥ тарҕаныан иннинэ буолбута. Оттон 5-9 кылаастарга хамсыгынан (коронавируһунан) сибээстээн, күһүҥҥүгэ көспүтэ. Аҕыйах хонуктааҕыта Үөрэҕи уонна науканы кэтээн көрөр федеральнай сулууспа бирикээһинэн, бэрэбиэркэлиир үлэ болдьоҕо ыйылынна.
Ол курдук, ааспыт үөрэх дьылыгар үөрэтиллибит бырагыраамалары бэрэбиэркэлиир аналлаах үлэлэри 5-9 кылаас үөрэнээччилэригэр балаҕан ыйын 14 күнүттэн алтынньы 12 күнүгэр диэри ыытарга эппиттэр. Биридимиэттэринэн чопчу ханнык күҥҥэ туруоралларын оскуолалар бэйэлэрэ быһаараллар. Маныаха 5-8 кылаас үөрэнээччилэригэр тустаах үлэ булгуччулаах. Онтон 9 кылаастарга оскуола быһаарыытынан боруобалаан көрүү (апробация) быһыытынан буолуо дэһэллэр.
Сорохтор Бүтүн Арассыыйатааҕы бэрэбиэркэлиир үлэни (ВПР) эксээмэҥҥэ холууллар. Дьиҥэр, министиэристибэлэр, үөрэх тэрилтэлэрэ даҕаны оннук буолбатах диэн хара маҥнайгыттан бэлиэтииллэр. Бэрэбиэркэлиир үлэ сыаната оҕо кылааһы тахсарыгар дьайбат. Оҕо билиитин, үөрэх бырагырааматын төһө ылыммытын көрдөрөр сыллааҕы хонтуруолунай үлэ буолар. Онон биир кэлим эксээмэҥҥэ (ЕГЭ) холоон күүркэтэр сыыһа.
Людмила ПОПОВА, “Саха сирэ” хаһыат, edersaas.ru