Илиҥҥи гороскобунан Бөтүүк “хаһаайыннаах” 2017 сылы көрсө, интэриэһинэй хаартыскалары мунньан таһаарабыт.
2016 сыллаахха Bloomberg сайт Дьокуускайы аан дойду үрдүнэн саамай тымныы куоратынан ааттаабыта. Саха сирин тымныытыгар итии уу тута тоҥорун омуктар көрөн, сөрү диэн сөхпүттэр. Оттон куорат баһылыга Айсен Николаев эһиилги сылы Үтүө санаа сылынан биллэрдэ.
Үөһээ Бүлүү Туобуйатыгар оҕолор оонньуур былаһааккаларыгар олохтоохтор сылаас дьиэ туттулар. Оҕолор тоҥмокко иһирдьэнэн-таһырдьанан оонньуур кыахтаннылар. Сайынын ардахтан, кумаартан хаххаланаллар.
Амма улууһун Бөтүҥ нэһилиэгэр Вильнюс куорат харыйатыгар майгынныыр харыйаны туруордулар. Омук түннүктээх-үөлэстээх харыйата аан дойду саамай ураты харыйаларын ахсааныгар сылдьар. Биһиэнэ даҕаны хаалсыбатах дии?
Сунтаарга хаарынан оҥоһуллубут Эһээ Дьыл уонна Хаарчаана харахтара батыһа көрөллөрүн гына толкуйдаабыттар. Аатырар “Мона Лиза” хартыына курдук. Дьэ, дьикти.
Саҥа дьылы көрсө оҕо саадтара “флеш-моб” оҥордулар. Оҕолору тыаҕа таһааран, остуоруйаҕа курдук, Тымныы оҕонньордуун, Хаарчааналыын көрүһүннэрэллэр. Үөһээ Бүлүү Дүллүкүтүттэн саҕаламмыта. Онтон Чурапчы Мугудайдара, Нам Хамаҕаттата, Абый улууһун Уолбут нэһилиэгэ, Дьокуускай национальнай гимназията салҕаабыттара.
Амма олохтооҕо Афанасий Осипов кэлэр сыл бэлиэтэ бөтүүгү “дьиэ кэргэнин” кытта ханыылаан хаарынан оҥорбутун элбэх киһи сэҥээрдэ.
Уус Алдан Тулунатын оҕо саадын үлэһиттэрэ төрөппүттэр өйөбүллэринэн Саҥа дьыллааҕы бырааһынньыкка кэлбит оҕолорго хаартыскаҕа түһэллэригэр анаан кыһыҥҥы остуоруйа фонун оҥорбуттар.
Бу 1961с. Дьокуускайга Ленин болуоссатыгар турбут аан бастакы харыйа.
edersaas.ru