Уопсастыба

Бөтүҥҥэ Красноярскайтан 100 сүөһүнү аҕаллылар

Бэҕэһээ, алтынньы 18 күнүгэр, Красноярскай кыраай «Глядин» ХЭТ племенной хаһаайыстыбатыттан 100 төбө хоро5ор муостааҕы Нам улууһун Бөтүҥ нэһилиэгэр аҕаллылар.

edersaas.ru

Сибиир кытархай эриэн дьүһүннээх, өлгөм үүттээх ынах сүөһүтэ сэммэнтээли кытта голштинскай боруода буккуспутуттан үөскэтиллибит. Бу сүөһүлэр сүрүн уратылара — хотоҥҥо бааллыбакка тураллар.


Улуустааҕы тыа хаһаайыстыбатын управлениетын салайааччыта Владимир Макаров үлэ туһунан бу курдук билиһиннэрдэ:
Ынах сүөһү анал көлөнөн Красноярскай кыраайтан аҕыс күн устата 4 тыһыынчаттан тахса килэмиэтирдээх айаны айаннаан этэҥҥэ кэллэ. 


Төрүүр тыһаҕастар Александр
Слепцов бааһынай хаһаайыстыбатыгар аадырыстанан кэллилэр. Бөтүҥҥэ билигин хотон тутуллар. Александр Петрович 2019 сыллаахха тыа хаһаайыстыбатын министиэристибэтэ Дьиэ кэргэн пиэрмэлэригэр бэриллэр Гранын ылан, хотон тутуутун, племенной сүөһүнү ылыы уонна бааһыналары чөлүгэр түһэрии үлэтин ыытар. Пиэрмэр сүрүн соруга — племенной сүөһүнү иитэн, нэһилиэнньэни үүт бородууксуйатынан хааччыйыы, үүт ас оҥоһугун араас көрүҥүн оҥорон таһаарыы, ону тэҥэ улуус тыатын хаһаайыстыбатын салаатын үлэтин хайысхатыгар сонун сүүрээни киллэрии. 

Саҥа боруода сүөһү Нам сиригэр үктэниитин туһунан «Нам улууһа» МТ пресс-киинэ иһитиннэрдэ.

Елена ПОТОЦКАЯ, «Саха сирэ» хаһыат сирэ, edersaas.ru

 

Хаартыска — «Нам улууһа» МТ инстаграмыттан.

0
1

Добавить комментарий