Хаҥалас улууһун II Малдьаҕар нэһилиэгэр баар «Бөртө» сылгы собуота» хааччахтаммыт эппиэтинэстээх тэрилтэ (салайааччы Александр Павлов) сүөһүтүн биэс сиринэн сайылатта.
edersaas.ru
Хаһаайыстыба ыанар ынахтара уонна ньирэйдэрэ урукку сыллартан Уу Көхсүгэр уонна Куоһаҕаска сайылыыллара. Ыанньык ахсаана элбээн иһэринэн уонна мэччирэҥ ноҕуруускатын чэпчэтээри, «Бөртө» былырыын Мондурах учаастагар үһүс сайылыгын туттубута. Онуоха Тыа хаһаайыстыбатын министиэристибэтин сайылыктааһыҥҥа анал бырагыраамата тирэх буолбута. Инньэ гынан 360 ыанар ынах үс сайылыгынан сайылаан турар.
– Кыстыкка бу ый бүтүүтэ көһүөхпүт, – диир биригэдьиир-зоотехник Ульяна Семенова. – Быйыл дьэ кураана бэрдинэн ынахтар наар хара тыаны кэрийэн тахсар, ыамы көтүтэр буоланнар, атырдьах ыйыттан икки сайылыкка иккилии бостууктанныбыт, оттон Мондурах сайылыгын ынахтара бүтэйдээх ходуһаларынан мэччийэр буоланнар, биир бостууктаахтар.
Уу Көхсүн пиэрмэтигэр урукку сыллартан үлэлиир уопуттаах Раиса Борисова, Нина Анастатова, Анна Слепцова уонна Семен Шишигин ыанньыксыттыылар. Биирдии бэйэлэрэ 30-туу ынахтаахтар. Александр Абрамов уонна Семен Шишигин бостууктууллар. Куоһаҕас пиэрмэтигэр Екатерина Иванова, Саргылаана Осипова, Ульяна Архипова уонна Лариса Лукина ыанньыксыттыыллар. Валентин Яковлев уонна Дьулус Слепцов бостууктууллар. Мондурахха Светлана Трофимова, Анастасия Таппыева, Марина Татаринова уонна . Валерий Ефремов бостууктуур.
Араҕас Атыыр учаастагар Владимир Голоков көрүүтүнэн-истиитинэн сайылаабыт 302 субан сүөһүнү ааспыт нэдиэлэҕэ өрүс арыытыгар отордото киллэрбиттэр. Маны таһынан үрэххэ, Сахсаа сайылыгар, Валентин Степанов 120 калмык сүөһүтүн көрө-истэ сылдьар.
300 ынах сиэмэлэннэ
Сүрүн дохуот үүттэн киирэр буолан, хаһаайыстыба зоотехниктара ынах ыанар кэмин уһатарга, үүтү сылы эргиччи ыларга дьулуһаллар. Инньэ гынан, ынахтары алтынньы-сэтинньи ыйтан саҕалаан, бэс ыйыгар диэри төрөтөллөр.
Урукку сыллартан таһаарыылаахтык үлэлиир техник-осеменатордар Надежда уонна Светлана Васильевалар сайылыктарга үрдүттэн олорон, ынахтар көҕүйэллэрин көрө сылдьаннар, кэмин куоттарбакка сиэмэлээн иһэллэр. Титиик ахсын анал хостоохтор, ханнык ыанньыксыт ынаҕа хаһан сиэмэлэммитин бэлиэтиир тэтэрээттээхтэр.
Сууккатааҕы эбиллии 600 грамм
Хаһаайыстыба 309 ньирэйин биэс киһи көрөр, кинилэр биирдии бэйэлэрэ нуорма быһыытынан 60-нуу ньирэйдээхтэр. Ол курдук, Уу Көхсүн сайылыгар Софья Аркадьева, Герман Аргылов уонна Леонид Анастатов, оттон Куоһаҕаска Любомир Лотов уонна Дьулус Слепцов үлэлии сылдьаллар. Мэччирэҥ төһө да мөлтөх буоллар, көрүү-истии күүһүнэн, ньирэйдэр көрүҥнэрэ куһаҕана суох.
– Күҥҥэ иккитэ аһатабыт, – дэһэллэр ньирэй көрөөччүлэр. – Ый ахсын ыйааһынныыбыт. Сууккатааҕы эбиллии 600 грамм буолар, бастыҥнар 800 грамҥа, өссө сороҕор биир киилэҕэ тиийэ эбиллэллэр.
Раиса Сибирякова, «Саха сирэ» хаһыат, edersaas.ru
Владимир Григорьев хаартыскаҕа түһэриилэрэ