Ынах сүөһүнү уонна сылгыны иитиигэ федеральнай таһымнаах племенной «Бөртө» сылгы собуота» ХЭУо-ҕа быйыл малааһынынан баай сыл буолла. Ол курдук, ааспыт ыйга эрэ манна Үөрэтэр киини уонна механизированнай буойунаны үлэҕэ киллэрии бэлиэтэммитэ.
Бэҕэһээ хаһаайыстыба «Туймаада» ҮАПК чэрчитинэн 120 ынах турар саҥа комплексын малааһыннаата. Санатан эттэххэ, «Бөртө» ааспыт сылларга «Туймаада» бырагырааматынан 240 ынахха анаммыт комплексы итиэннэ иллэрээ сыл бэйэтин күүһүнэн субан хотонун туттубута. Онон сүөһүтүн барытын толору хааччыллыылаах хотоннорго киллэрдэ!
— Ууну кэһэ сылдьан эргэ хотоҥҥо үлэлээбиппит тохтоото, үөрэ-көтө үлэлиир усулуобуйаланныбыт. Бу биһиэхэ улахан үөрүү! Өрөспүүбүлүкэҕэ үлэ базатын тутуу уонна хаһаайыстыбалары чэбдигирдии бырагыраамалара кэлэр да өттүгэр салҕана туруохтун. Онуоха биһиги таһаарыылаах үлэбитинэн хардарыахпыт, – диэтэ ыанньыксыттар ааттарыттан Ульяна Семенова.
Бу күн үлэ дьонун аатыгар элбэх үтүө тыл этилиннэ, алгыс ананна. Пиэрмэҕэ 1980-с сыллартан таһаарыылаахтык үлэлиир, бастыҥ ыанньыксыт Валентина Трофимоваҕа «Саха өрөспүүбүлүкэтин тыатын хаһаайыстыбатын бочуоттаах үлэһитэ», комплекска үлэ-хамнас харыыта суох барарын хааччыйар сантехник Владимир Ивановка «Саха өрөспүүбүлүкэтин тыатын хаһаайыстыбатын туйгуна» бочуоттаах аат иҥэрилиннэ. Уон төрдүс сылын ыанньыксыттыыр, ол иһигэр 2014 сылтан ынаҕын ахсыттан 3 тыһ. тахса киилэ үүтү ыыр Екатерина Аммосова уонна осеменатор Светлана Васильева Ил Түмэн аграрнай политикаҕа сис кэмитиэтин Бочуотунай Грамотатынан, сопхуос саҕаттан биригэдьиир-зоотехник муоһатын тутан кэлбит Ульяна Семенова «Хаҥалас улууһун социальнай-экономическай сайдыытыгар өҥөтүн иһин» түөскэ кэтиллэр знагынан наҕараадаланнылар.
Раиса Сибирякова, “Саха сирэ” хаһыат, edersaas.ru
Хаартыскаларга саҥа комплекс малааһыныттан:
1. «Бөртө» сылгы собуота» ХЭУо салайааччыта Александр Павлов аал уокка айах тутар.
2. Бырабыыталыстыба Бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев Валентина Трофимоваҕа «Саха өрөспүүбүлүкэтин тыатын хаһаайыстыбатын бочуоттаах үлэһитэ» бэлиэни туттарар.
3. Ил Түмэн аграрнай политикаҕа сис кэмитиэтин бэрэссэдээтэлэ Дмитрий Саввин бастыҥ ыанньыксыт Екатерина Аммосоваҕа Бочуотунай Грамота туттарар.
4. Ситим быстыбат, көлүөнэ утумнаһар.