Хаҥалас улууһун II Малдьаҕар нэһилиэгэр баар «Бөртө» сылгы собуота» хааччахтаммыт эппиэтинэстээх тэрилтэ (салайааччы Александр Павлов) сүөһүтүн биэс сиринэн сайылатта.
Төһө даҕаны кураан сайын буоллар, үлэ тэрээһинэ үчүгэйиттэн көрдөрүү улаханнык түспэтэ. Хаһаайыстыба эти-үүтү оҥорууга тирэх буолар саха төрүт үгэһин, отордооһуну, көдьүүстээхтик туһанар. Ол курдук, ааспыт нэдиэлэҕэ 300 субан сүөһүнү өрүс арыытыгар отордото киллэрбиттэрэ. Бу сүөһүлэр Араҕас атыыр учаастагар Владимир Голоков көрүүтүнэн-истиитинэн сайылаабыттара, аны кыһын үксүлэрэ идэһэ буолуохтаахтар.
Хаһаайыстыба биригэдьиир-зоотехнига Ульяна Семенова бүгүн Сахсаа сайылыгар Валентин Степанов көрүүтүнэн сайылаабыт 120 калмык сүөһүтүн арыыга киллэрбиттэрин туһунан кэпсээтэ уонна бу хаартыскалары ыытта.
Раиса Сибирякова, «Саха сирэ», edersaas.ru