Саха сирин дьаһалтата ойуур баһаарын умулларар бөртөлүөттэри анал оборудованиета суох авиа былаһааккаларга сапараапкаланыахтарын сөбүн көҥүллүүр туһунан боппуруос көтөҕөллөр.
Анал оборудованиета суох авиа былаһааккаларга сапараапкаланыы туһунан салгын тырааныспарын Федеральнай сулууспата хааччахтыыр. Онон билиҥҥи туругунан бөртөлүөттэр сапараапкаланаары улахан аэродромнарга айанныыллар. Бу суһал балаһыанньаҕа дьайар, үлэ хаамыытын бытаардар.
Маннык этиилээх СӨ Ил Дархана Айсен Николаев ойуур баһаарын сезонун координационнай сугулааныгар этии көтөхтө. Бу мунньахха РФ гражданскай оборона, ыксаллаах быһыыга-майгыга уонна айылҕа быһылаанын содулун туоратыыга миниистирэ Александр Куренков, РФ айылҕа ресурсаларын уонна экология миниистирэ Александр Козлов сырыттылар.
— Биһиги билигин саамай элбэх ойуур баһаара үөскүүр кэмигэр үктэннибит. Өрөспүүбүлүкэ үрдүнэн кураан, итии күннэр турдулар. Ойуур баһаарын ахсаана элбиир чинчилээх. Биллэн турар, биһиги суһал миэрэлэри ылыахпыт. Ол эрээри бүгүҥҥү күҥҥэ биһиэхэ анал оборудованиета суох былаһааккаларга бөртөлүөт сапараапкаланар кыаҕа суох. Бу суһал миэрэлэри ылыныыга үлэ хаамыытын бытаардар. Былырыын Горнай оройуонугар баһаарга бөртөлүөттэр чаас кэриҥэ көппүттэрэ. Чаастан ордук үлэлээн баран сапараапкаланаары Дьокуускайга кэлэллэрэ. Өскөтүн, кинилэр Бэрдьигэстээххэ сапараапкаланар кыахтаахтара буоллар, айаҥҥа 20 мүнүүтэ барыа этэ, — диэтэ Ил Дархан Айсен Николаев. Кини сапараапкалыырга хаачыстыбаны хонтуруоллуурга, заправкаҕа бэриллэригэр бэлэмнииргэ, тутарга уонна хаһаанарга салайар үлэтигэр уларытыыны киллэрэр боппуруоһу көрөрү көтөхтө. Ил Дархан этиитин кытта Куренков уонна Козлов сөбүлэстилэр. Кинилэр икки федеральнай биэдэмэстибэлэр өйүүллэрин туһунан эттилэр. Боппуруос Росавиация көрүүтүгэр киириэҕэ диэтилэр.
Маны сэргэ, Айсен Николаев РФ айылҕа харыстабылын министиэристибэтин уонна ЫБММ биэдэмэстибэлэрин картографическай интерфейстарыгар уларытыылары киллэрии туһунан этии киллэрдэ. Кини бэлиэтииринэн, ойуур баһаарын регистрациялыырга нэһилиэнньэлээх пууннарга сыһыарыы барыта картографическай сибидиэнньэнэн оҥоһуллар, оттон балар бары 60-70 сс буолалларын эттэ. Маныаха сорох нэһилиэнньэлээх пууннар, холобур, хоту дьон олорбот сирдэрэ эмиэ баалларын бэлиэтээтэ. Онон маннык сибидиэнньэлэртэн сылтаан өйдөммөт түгэннэр үөскүүллэрин эттэ.
Баһаар туһунан этэригэр, Ил Дархан былырыыҥҥыга тэҥнээтэххэ быйыл ойуур баһаара үс төгүл аҕыйаҕын иһитиннэрдэ. Былырыын бу кэмҥэ 369 ойуур баһаара баар эбит буоллаҕына, быйыл 125 бэлиэтэнэр. Ойуур баһаара ылбыт сирэ түөрт төгүл кыра. Былырыын 150 тахса тыһыынча гектар уокка сиэниллибит буоллаҕына, быйыл 42 тыһыынча гектарга тэҥнэһэр.
Ульяна ЗАХАРОВА.