Хаҥалас улууһун Улахан Аан нэһилиэгэр тыа хаһаайыстыбатын үлэтин хас да хайысханан тэрийэн олорор «Бөртө” сылгы собуота» ХЭУо сүөһүлэрэ кыстыгы үчүгэй туруктаах туораатылар.
edersaas.ru
Улахан Аан бөһүөлэгэ Өлүөнэ өрүс үрдүгэр турар буолан, сааскы халааны көрсө олохтоохтор ынах сүөһүлэрин хотоҥҥо хаайан турар, оттон субаттарын куттала суох сиргэ, ыраах алаастарга таһаарар үгэстээхтэр.
Онон «Бөртө» хаһаайыстыба үлэһиттэрэ өссө Пиэримэй Маай бырааһынныгын иннинэ сылгыларын өрүс арыыларыттан ыраах тыаҕа баар баазаларыгар таһаартаабыттара, оттон бу күннэргэ 280 субан сүөһүнү сайылыкка таһаардылар.
– Коронавируһунан сибээстээн хааччахтыыр миэрэлэри тутуһан, санитарнай ирдэбиллэри киллэрэн, тустаах үлэбитин толоро сылдьабыт, — диир биригэдьиир Ульяна Семенова. – Cубан сүөһүлэрбитин сайылыкка таһаардыбыт, оттон ыанар ынахтарбытын уонна ньирэйдэрбитин арыый хойут таһаарыахпыт.
Ынахтарбыт сүрүннээн төрөөн бүттүлэр, 40 эрэ ынах төрүү илик. Билиҥҥитэ 269 ньирэйдээхпит. Быйыл 330 ыанар ынахтаахпыт итиэннэ уруккубут курдук, кэтэх ыаллар ынахтарын ылан ыахпыт. Инньэ гынан, барыта холбоон биир тыһыынча ынах сүөһүлэннибит.
Ыанар ынахпыт элбээн, Мондурах диэн сиргэ саҥа сайылыгы туттабыт. Ону таһынан, дьоммут көһөн тахсалларыгар бэлэмнээн, атын сайылыктарбытын сөргүтэ, оттук мас таһа сылдьабыт.
Раиса Сибирякова, «Саха сирэ» хаһыат. edersaas.ru