Хаҥалас улуус биир бөдөҥ хаһаайыстыбата «Бөртө» сылгы собуота» хааччахтаммыт эппиэтинэстээх уопсастыба 3 тыһыынча туонна оту оттуур, 1 тыһыынча 500 туонна сиилэһи угар, 600 туонна сенаһы бэлэмниир сорудахтаах.
edersaas.ru
Саас түөрт сиринэн, барыта холбоон 550 гектардаах бааһынаҕа эбиэстээх Судан отун холбуу ыспыт. Сенажтыырга анаммыт арыы бааһынатын үүнүүтэ куһаҕана суох, оттон сиилэстэниэхтээх алаас бааһынатын үүнүүтэ арыый мөлтөх эбит. Бу ыйтан хомуур саҕаланыахтаах.
– Оттон окко кэллэххэ, арыыга уу ылбатах сирэ уонна тыа алаастара курааннаан хааллылар, – диир хаһаайыстыба салайааччыта Александр Павлов. – Ол да буоллар, төһө кыалларынан оттуурга соруктанан, алта толору мэхэньисээссийэлээх биригээдэни туруоран, ходуһаҕа от ыйын 9 күнүттэн киирбиппит. Бу иһиттэн икки биригээдэ алаастарга, түөрт биригээдэ өрүс арыыларыгар киирэн оттуу сылдьаллар.
Билиҥҥи туругунан 495 туонна оттоохпут, ити иһиттэн Ньургун Федоров биригээдэтэ 200 туоннаны, Иван Пахомов биригээдэтэ 110 туоннаны оттоотулар. Ойуур баһаардарыттан сылтаан, буруота бэрт буолан от сүгүн куурбата үлэни атахтыыр. Чугастааҕы арыыбытын бүтэрдэхпитинэ, Хачыкаат сиригэр тахсан оттуохпут, онон бэйэбит барыллыырбытынан, 2 тыһыынча 700 туонна оту хааччыныахпын сөп.
Раиса Сибирякова, «Саха сирэ» хаһыат, edersaas.ru